Premer-mınıstr Oljas Bektenov baılanys jáne ınternet ınfraqurylymyna júkteme kúrt artýyna qatysty máseleni pysyqtaýdy tapsyrdy, dep habarlaıdy Dalanews.kz.
Úkimet otyrysynda Oljas Bektenov ınternet sapasyna qatysty másele baryn aıtty.
"Turaqty ınternet búginde ıgilikten bólek, halyqtyń kúndelikti ómiri men zamanaýı ekonomıkanyń mańyzdy qajettiligine aınaldy. Sonymen qatar, jol boıynda mobıldi baılanys turaqsyz, aýyldy jerlerde ınternet óte baıaý, tipti qalalardyń ózinde aýqymdy is-sharalar barysynda ınternet sapasy nasharlap ketedi degen syńaıda aryz-shaǵymdar azaımaı otyr", - dedi premer-mınıstr.Osyǵan baılanysty Oljas Bektenov Jasandy ıntellekt mınıstrligine osyndaı úlken sharalar kezinde baılanys jáne ınternet ınfraqurylymyna júkteme kúrt artýyna qatysty máseleni operatorlarmen birge muqıat pysyqtaýdy tapsyrdy.
Al buǵan deıin premer-mınıstrdiń orynbasary – jasandy ıntellekt jáne sıfrlyq damý mınıstri Jaslan Mádıev "2027 jylǵa qaraı halyqtyń 100%-y ınternetpen qamtylady", - dep sendirdi.
