Áleýmettik jelide namaz oqyǵan oqýshylardyń videosy tarap ketken edi. Jeli qoldanýshylary bul jaǵdai mektep qabyrǵasynda bolyp jatqanyn aityp shýlady. Oqý-aǵartý ministri Ǵani Beisembaev osy máselege qatysty pikir bildirdi, - dep habarlaidy Dalanews.kz.
Ministrdiń sózinshe, qazir bul oqiǵa qai óńirde, qai mektepte bolǵany zerttelip jatyr, ázirge belgisiz.
"Mán-jaidy anyqtaǵannan keiin belgili bir sharalar qabyldanady. Qaida bolǵany anyqtalǵanyn kútemiz. Aldymen bul mektepte boldy ma, joq pa, sony bileiik", - deidi Beisembaev.
Sondai-aq, sheneýnik "mektepte namazhana bolýy kerek pe?" degen saýalǵa da jaýap berdi.
"Mektep - eń aldymen bilim men tárbie oshaǵy. Sondyqtan mektepti mindetti túrde ustazdarymyz balalarymyzǵa bilim berýge baǵyttaýy kerek. Bul týraly únemi aityp júrmiz. Bul ustanymnan taiǵan emespiz. Sondyqtan munda basqa máseleni kóterýdiń qajeti joq dep oilaimyn. Bul - múmkin emes nárse", - dedi ol.
Buǵan deiin de mekteptegi oqýshylardyń hidjab kiiýi, namaz oqýy sekildi máseleler birneshe ret kóterildi. Beisembaev ministr bolǵaly osyndai taqyryptardan alystai almai júr.
