Óz tilin mensinbeitin jandardyń osyndai áreketinen keiin qazaqty kemsitýshilerdiń qatary kóbeimese azaimatyny anyq.
Búginde bizdiń qoǵamda bir qyzyq jaǵdai qalyptasqan. Ainalańnan qazaq tilinde sóileýdi talap etseń, poýpýlist, saiasi upai jinaýshy bolyp shyǵa kelesiń.
Al baýyrlas Túrkiiadan kelip Qazaqstanda jumys istep, otandyq kompaniia qyzmetkerleriniń qazaq tilinde sóileýdi talap etip júrgen Oǵyz Doǵannyń áreketin ne deýge bolady?
Ony popýlist, saiasi upai jinaýshy dep aitýǵa aýyzyń barmaidy. Óitkeni Oǵyz Doǵan sailaýǵa túsip, depýtat bolatyn oiy joq, bóten eldiń azamaty.
Biz biletin Oǵyz Doǵan túrik jáne qazaq (múmikin aǵylshyn tilin biletin shyǵar) tilin ǵana biletin ózge eldiń azamaty.
Ol Qazaqstan zańdary qazaq tilinde qyzmet alýǵa múmkindik bar ekenin biledi. Tipti, bul jerde ony qazaq tiliniń múddesin kózdeitin azamat dep dáriptemei-aq qoialyq. Ony óziniń zańdy quqyǵyn talap etýshi azamat ataǵan jón shyǵar.
Menedjerler halyq pen Qazkom arasyna syna qaqty
Al Qazkom bankiniń filialda otyrǵan onshaqty qyzmetkerdiń bir klientine zań aiasynda qazaq tilinde qyzmet kórsete almaýyn ne deýge bolady? Abyroisyzdyqtyń budan asqan túri bar ma?
Olar osylaisha ózderiniń zańdy qyzmetiniń mánin túsinbei elimizdegi irgeli Qazkom banki men halyq arasynda syna qaqqanyn baiqamady. Áleýmettik jelige taralyp ketken videony kórgende bank qyzmetkerleriniń Qazkom-dy qalai «podstvit» etkenin baiqar edi.
Astana tórindegi Qazkom bankiniń bir bólimshesinde qazaq tilinde bir adamnyń tabylmaýy múmkin emes. Oǵyz Doǵannyń sotkasyna túsken qyzmetkerlerdiń bári qazaqtar, qazaq tilin biletinderi de baiqalyp turdy. Biraq qyrsyqqan bank qyzmetkerleri meńireý adam sekildi qazaq tilinde ún qatpady.
Qatty qorlandyq
Klient múddesi úshin jumys isteitin menedjerlerdiń bolmashy jerden daý týǵyzyp, qarjy uiymynyń abyroiyn aiaq asty etkenin qalai túsinýge bolady? Mundaida sheteldiń bankteri daýkes qyzmetkerdi sol zamatta jumystan shyǵaryp, klientten keshirim suraityny anyq.
Qazaq tilin bile tura qazaq tilinde sóilemegen Qazkom qyzmetkerleri ózderiniń dókir áreketimen milliondaǵan qazaqtyń júregine qanjar suǵyp alǵanyn bile me?
Áleýmettik jeline sharlap ketken videodan olardyń ózderiniń áreketi úshin qymsynbaǵanyn baiqap, qatty qorlandyq. Qazkom qyzmetkerleriniń bul áreketin el ishine jik salý, tildik diskrimnatsiiany qozydyrý dep baǵalaýǵa bolady.
Qazkom qyrsyq qazaq tilinde qyzmet kórsetýge qulqy joq qyzmetkerlerin arylyp, qysqa merzimde osy jaǵdaidy ózge qyzmetkerlerine sabaq retinde usynýy kerek. Áitpese, Qazkom biraz klientinen aiyrylyp qalýy ábden múmkin.
https://dalanews.kz/35647
