Depýtat Janarbek Áshimjanov qymbatshylyq qysqan ýaqytta tarif baǵasy da kóterilip ketkenin synady, dep habarlaidy Dalanews.kz.
Depýtattyń pikirinshe, búginde smartfonsyz ómirimizdi elestetý múmkin emes, bailanys quraldary kúndelikti tutynatyn azyq-túligińizden de kem bolmai tur.
"Elimizdegi teleoperatorlardyń sońǵy kezderdegi qadamdary el qulaǵynda jattalyp qalǵan "Samarqanda bir apam bar, budan da ótken soraqy" deitin kóne támsildi eriksiz eske túsiredi. Taiaýda Qazaqstannyń uialy telefon operatorlary – Altel, Tele2, Beeline uialy telefonnyń abonent tólemin 20 paiyzǵa ósiretinin málimdedi. Iaǵni bul operatorlar internettiń de tarifin 20 paiyzǵa ósiredi degen sóz. Sóz emes, solai ashyq málimdedi", - dedi ol.
Depýtattyń aitýynsha, eldegi teloperatorlardyń bul qadamy – milliondaǵan qazaqstandyqtyń qaltasyna salmaq salatyn sheshim.
"Óitkeni búginde telefon men internet – halyqtyń aqparatqa qoly jetkizýi, jumyspen qamtylýy, kásipkerlik júrgizýi, balanyń bilim alýy, memleketpen bailanys ornatýy úshin eń mańyzdy qural. Iaǵni tariftiń kóterilýi qarapaiym otbasylardyń biýdjetine ǵana emes, olardyń ómir súrý sapasyna qol suǵý dep baǵalaýǵa týra keledi. Bul qadam bizdiń halqymyzdyń barlyq áleýmettik tobynyń qaltasyna "qyrǵidai tietini" anyq. Qazaqstan halqynyń barlyǵy derlik uialy telefon paidalanady. Osy aqparat shyqqaly elimizdiń ár óńirinen sailaýshylar habarlasyp, áleýmettik jelilerde, qabyldaý bólmelerinde ózderiniń shaǵymyn bildirip, "Kúnkóris qiyndap turǵanda, nege bailanys ta qymbattaýǵa tiis?", "Nege baǵa bir mezette kóterildi?" degen zańdy saýaldar qoiylyp jatyr", - dedi ol.
Janarbek Áshimjanovtyń pikirinshe, eń qyzyǵy úsh iri operatordyń tarifti birdei kólemde, bir ýaqytta qymbattatýy qoǵamda úlken kúmán týdyryp otyr.
"Bul kompaniialar arasyndaǵy básekeniń emes, ózara kelisimniń, úilesimniń, astyrtyn aqyldasýdyń belgisi emes pe? "Baital túgil bas qaiǵy" degendei, osyndai qadamdardan keiin "Qoljetimdi internet" ulttyq jobasyn oilaýdyń ózi muń bolyp qaldy... Bul jaǵdai qarapaiym tutynýshylardyń quqyǵyn taptaý dep esepmteimiz. Sebebi baǵa ósedi, biraq naryqta balama operator joq, iaǵni tutynýshy tańdaý múmkindiginen aiyrylady. Nátijesinde abonentter bajsyz (jai ǵana baǵany kelisip kóterý arqyly) joǵary aqy tóleýge mindetteledi", - dep ashyndy depýtat.
