Belgili dintanýshy Qairat Joldybaiuly "musylmansha neke qiiý" máselesine bailanysty oiyn ortaǵa saldy, dep habarlaidy Dalanews.kz.
Onyń sózinshe, zańdy nekege turmaǵan jas-jubailardyń dini nekesine shekteý qoiý ári osy úshin dini qyzmetkerlerdi jaýapqa tartý - orynsyz dúnie.
"Biz zaiyrly memleket bolǵandyqtan, dini nekeniń zań turǵysynan eshbir salmaǵynyń joqtyǵy bárimizge belgili jait. Dini neke – sábige at qoiý, janaza shyǵarý siiaqty bar bolǵany dástúri qundylyq, rýhani jaýapkershilik, dini rásim. Ol ár adamnyń senim máselesi. Al endi quqyqtyq turǵydan esh salmaǵy joq rýhani qundylyqqa qandaida bir shekteý qoiý, dini qyzmetkerlerdi ol úshin jaýapqa tartý ata-zańda qorǵalǵan kisiniń nanym-senimine qysym jasaýǵa jatady.
AHAJ-ǵa tirkelmes buryn dini neke qiiýǵa shekteý qoiý qisynsyz. Eger bul rýhani qundylyqqa álgindei shekteý men talap qoiatyn bolsaq, onda AHAJ-ǵa tirkelmes buryn kelin túsirý, betashar jasaý, úlkenderdiń bata berý siiaqty áreketterine de, búginde keń etek alyp bara jatqan azamattyq nekege de shekteý qoiyp, jaýapqa tartýymyz kerek bolady", - deidi dintanýshy.
Aitýynsha, munda bastysy shańyraq kóterýge bel býǵan juptardyń neke jasy jáne ózindik qalaýy eskerilýi shart.
"Másele nekeni qiiýda emes, dini nekege nietti kisilerdiń zańda kórsetilgen jasqa jetip-jetpegeni, óz erkimen qidyryp-qidyrmaǵany bolýǵa tiis. Sondai-aq jaýapkershilik te ózderimen ǵana shektelýi kerek.
Túrli teris aǵamdyrdyń qate áreketterin retteý úshin dini qundylyqtarǵa álgindei qisynsyz talap qoiý iaki imamdardy sol úshin jaýapqa tartý durys sheshim emes. Shyn máninde dini nekeni qidyramyn degen kisi qajet bolsa, ony imamdarsyz-aq jasai beredi. Qyrǵyzstan sekildi jaqyn shetelge asyp, iaki sol jaqtan bireýdi shaqyrtyp ta qidyra salady", - dep jazdy ol áleýmettik jelidegi paraqshasynda.
Aita keteiik, kúni keshe 2022 jyly 17 qazanda eks-ministr Qýandyq Bishimbaev pen Saltanat Núkenovanyń nekesin qiǵan respýblikalyq bas meshittiń imamy Qanat Qydyrminge qatysty tártiptik shara qoldanylǵany habarlanǵan bolatyn. Bul týraly múftiiattyń baspasóz hatshysy Aǵabek Qonarbaiuly áleýmettik jelidegi paraqshasynda málimdedi.
Imam Bishimbaev pen onyń marqum áieli Núkenovanyń zańdy túrde nekege turmaǵanyna qaramastan, eki ret musylmansha nekelerin qiyp bergen. Bul týraly Bishimbaevtyń sotynda aitylǵan.
"2022 jyldyń 17 qazanynda Astana qalasyndaǵy Respýblikalyq bas meshitte Q.Bishimbaev pen S.Núkenovanyń óz ótinishteri boiynsha kýágerlerdiń qatysýymen olardyń nekeleri qiylǵan. Atalǵan azamattardan jáne olardyń týystarynan AHAT bólimine tirkelgenin rastaityn kýálik talap etilgende, olar «jasalyp jatyr» dep jaýap bergen. Olar dástúrge sai eki jaqtyń ata-analarynyń batasy men ruqsatyn alǵanyn, salt-dástúr jolymen nekelerin qiyp berýin ótingen. Atalǵan azamattardan AHAT bólimine tirkelgenin rastaityn kýálikti tabandy túrde talap etpegen, iaǵni QMDB-nyń ishki jumys tártibin buzǵan Respýblikalyq bas meshittiń imamy Q.Qydyrminge tártiptik shara qoldanylyp, eskertý jasaldy", - dep jazdy Aǵabek Qonarbaiuly.
Qanat Qydyrmin buryn Aqmola oblysynyń bas imamy, "Áziret Sultan" meshitinde naib imam, ustaz bolyp jumys istedi. Sonymen qatar, QMDB janyndaǵy "Zeket jáne qaiyrymdylyq" qorynyń direktory qyzmetin atqarǵan.
Esterińizge salaiyq, 2023 jyldyń 9 qarashasynda Qýandyq Bishimbaevqa azamattyq nekedegi áieli Saltanat Núkenovany óltirdi degen aiyp taǵyldy. Onyń soty joǵarǵy sottyń tikelei efirinde ótip jatyr.
