Sońǵy kúnderi marqum Sherzat Bolattyń ákesi Qarjaýbai Nurmanovtyń bet-álpetindegi ózgeris jurttyń nazaryn aýdara bastady. Áleýmettik jelidegi video-sýretterinen onyń kózi kógerip, murny qisaiǵanyn baiqaýǵa bolady. Kópshilikti alańdatqan osy suraqqa Nurmanovtyń qaryndasy jaýap berdi, dep habarlaidy Dalanews.kz.
Perizat Nurymovanyń sózinshe, qandy oqiǵa bolǵan kúni aǵasy kózinen jaraqat alǵan.
“Birinshiden, sýretke túskende durys rakýrs ustalmai qalǵan, ekinshiden, onyń murny burynnan qisyq edi. Degenmen, oqiǵa bolǵan kúni, dúkennen qashqan kezde betine bótelke tigen. Qazir sizder betindegi isigi qaitqan túrin kórip júrsizder ǵoi, onyń beti biraq isip ketken sýreti bar. Bet-álpetinde sol jaraqattan qalǵan kógergen izderi áli tur” – dedi Perizat Nurymova Ulysmedia.kz agenttigine bergen jaýabynda.
Ol belgilerdiń buǵan deiin baiqalmaýyn durys túsirilmegen sýrettermen bailanystyrdy.
“Órt bolǵan kúnderi de sondai bolǵan. Fotoǵa joǵarydan túsirgendikten, baiqalmaǵan bolýy múmkin. Al muryny buryn, úide áinek qoiyp jatqan kezde, áinek qulap ketken. Sodan synǵan. Odan keiin eshqandai jaraqat, eshqandai kúsh kórsetý bolǵan joq” – dep túsindirdi Qarjaýbaidyń qaryndasy Ulysmedia.kz-ke.
Eske salaiyq, buǵan deiin Talǵarda jappai tóbeles bolyp, saldarynan 16 jastaǵy jasóspirim kóz jumdy. Janjal jigittiń otbasy jalǵa alatyn dúkennen bastalǵan. Týystarynyń aitýynsha, saýda núktesine kelgen satyp alýshy syra alyp, aqshasyn tóleýden bas tartqan. Osy jaǵdaidan keiin tóbeles bastalǵan.
Kámeletke tolmaǵan balany óltirý faktisi boiynsha Almaty oblysynyń politsiia departamenti qylmystyq is qozǵady.
Qazirgi tańda kináli dep tanylǵan 7 adam ustalyp, ýaqytsha ustaý izoliatoryna qamaýǵa alynǵan.
Al 15 qazanda Ishki ister vitse-ministri taǵy úsh kúdiktini ustaǵanyn málim etti.
Sonymen qatar, Almaty oblystyq politsiia departamenti bastyǵynyń mindetin atqarýshy Shalqarov tóbelesten keiin qansha qarý tárkilengenin aitty.
Odan keiin Sherzattyń úiine kúzet qoiyldy.
Kóp uzamai marqum Sherzattyń úii órtendi.
Sondai-aq marqumnyń ákesi áldekimderdiń tarapynan birneshe ret qorqytý bolǵanyn jetkizgen edi.
“Meni bir emes, birneshe ret qorqytty. Alyp ketýler boldy. Telefonmen de. “Zańgermiz, advokatpyz, birge oqyp edik” dep kelip, aldap, meni dalaǵa shaqyryp alyp, qorqytýlar bolǵany ras”, - dedi marqumnyń ákesi.
Osy tusta ol ashyq sotty talap etetinin aitty.
“Halqymnan suraitynym – esh qan tógilmesin. Ashyq sot bolýyn talap etem. Ashyq sot bolsa, oń sheshim bolady. Esh arandatýǵa túspeńizdershi. Analar jylamasyn, balalardyń qany tógilmesin. Baýyrlarym, jigitter, arandamaiyqshy, aldanyp qalmaiyq. Joǵarydaǵy aǵalar da zań aiasynda qolǵa alyp jatyr. Erteń Astanadan, IIM-nen adam keledi dep aityldy. Sol aitarym. Balam óldi. Endi men basqa balalardyń bolashaǵy jaqsy bolsyn dep tileimin. Nietim de, armanym da osy”, - dedi ol.
