Birlesken Ministrlik monitoring komitetiniń 57-shi otyrysy jáne OPEK+ elderi ministrleriniń 38-shi kezdesýi ótti. Oǵan Qazaqstannan Energetika vitse-ministri Álibek Jamaýov qatysty, dep jazady Dalanews.kz.
Otyrysqa qatysýshylar kelisim negizderine beiildiligin rastady jáne OPEK-ke qatysýshy elder men OPEK-ke kirmeitin elder úshin munai óndirýdiń jalpy deńgeiin OPEK+ 35-shi ministrlik kezdesýinde qabyldanǵan sheshimderge sáikes, 2026 jylǵy 31 jeltoqsanǵa deiin uzartýǵa kelisti.
Qatysýshy elder mindettemelerdi tolyq saqtaýdyń jáne artyq oryndalǵan kólemderdi óteýdiń airyqsha mańyzdylyǵyn rastady.
"Buryn 2023 jyldyń sáýirinde jáne 2023 jyldyń qarashasynda qosymsha erikti qysqartýlar týraly jariialaǵan 8 el (Saýd Arabiiasy, Resei, Irak, Birikken Arab Ámirlikteri, Kýveit, Qazaqstan, Aljir jáne Oman) OPEK+elderiniń 38-shi ministrlik kezdesýi aiasynda bólek basqosý ótkizdi", dep habarlaidy QR Energetika ministrliginiń baspasóz qyzmeti.
Kezdesý munai naryqtaryndaǵy turaqtylyq pen tepe-teńdikti saqtaýǵa baǵyttalǵan OPEK+ elderiniń saqtyq sharalaryn kúsheitý maqsatynda ótkizildi.
Joǵaryda atalǵan elder 2023 jyldyń sáýirinde jariialanǵan qosymsha erikti qysqartýlardy táýligine 1,65 million barrelge 2026 jyldyń jeltoqsan aiynyń sońyna deiin uzartýǵa sheshim qabyldady. Sonymen qatar, osy elder 2023 jyldyń qarashasynda jariialanǵan kúnine 2,2 million barrelge qosymsha erikti qysqartýlaryn 2025 jyldyń naýryz aiynyń sońyna deiin uzartady, sodan keiin naryqtyq turaqtylyqty saqtaý úshin 2026 jyldyń qyrkúiek aiynyń sońyna deiin ai saiyn 2,2 million barrelge erikti qysqartýlar joiylady.
"Bul ai saiynǵy ósim naryq jaǵdaiyna bailanysty toqtatylýy nemese joiylýy múmkin. Ótemaqy kezeńi 2026 jyldyń maýsym aiynyń sońyna deiin uzartylady" dep naqtylaidy ministrlik.
