Juma kúngi Túrkiiadaǵy Resei jáne Ýkraina delegatsiiasynyń kelissózderi eki saǵatqa sozyldy. Alaida, kóp kútkendei, ol arada oq atýdy doǵarý boiynsha kelisim bolmaǵan, biraq onyń ornyna tutqyndarmen almasý jóninde bitim jasalǵan. Sáikesinshe, ile-shala Eýropalyq odaq Resei Federatsiiasyna qarsy ázirlep jatqan buryn-sońdy bolmaǵan keń aýqymdy sanktsiialarǵa qatysty málimetterdi jariialady. Iá, buǵan deiin batys elderiniń kóshbasshylary "eger Máskeý 30 kúndik bitim týraly usynystan bas tartsa, onda EO "keń aýqymdy ári ekonomikalyq turǵyda aýyr" sanktsiialardy qoldanýǵa májbúr bolatyndaryn málimdegen, dep habarlaidy Dalanews.kz.
16 mamyrda Briýsselde ótken brifingte EO-nyń joǵary laýazymdy ókili málim etkendei, Resei ekonomikasynyń negizgi sektorlary men yqpal etý quraldaryna baǵyttalǵan tórt sanktsiialyq rejim bir ýaqytta iske qosylmaq.
Sheneýniktiń aitýynsha, 20 mamyrda EO Syrtqy ister keńesiniń otyrysynda 17 jáne 18-sanktsiialar paketi qoldanysqa engiziletini jariialanady. Oǵan basty sebepter:
- Reseidiń Ýkrainaǵa qarsy agressiiasy úshin;
- adam quqyqtaryn buzǵany úshin;
- gibridti soǵys júrgizgeni úshin;
- himiialyq qarýdy qoldanǵany úshin.
Jalpy alǵanda, 130-dan astam jeke jáne zańdy tulǵalar, sondai-aq energetikalyq sanktsiialardy ainalyp ótýshi reseilik "kóleńkeli flottyń" 200 kemesi qara tizimge enedi.
Sanktsiianyń baǵyttalǵan nysandary: ónerkásip, munai, úgit-nasihat
Sanktsiialar Reseidiń áskeri-ónerkásiptik keshenine, úshinshi elderden sanktsiialyq taýarlardy jetkizýshilerge, úgit-nasihat taratýshylarǵa, jalǵan aqparat taratýshylarǵa jáne Ýkrainadaǵy áskeri is-qimyl kezinde repressiialyq himiialyq zattardy qoldanýǵa bailanysty jeke tulǵalarǵa áser etedi.
EO gibridtik qyzmet úshin 27 jeke jáne korporativtik sanktsiialardy jáne adam quqyqtaryn buzǵany úshin 28 sanktsiialardy, sonyń ishinde Resei Federatsiiasynyń bilik ókilderine, arnaiy qyzmetter men aimaqtyq ákimshilikterdiń qyzmetkerlerine qarsy baǵyttalady.
Jańa 18-shi paket: energiia men qarjy salasyna qysym jasaityn bolady
16 mamyrda, Eýrokomissiia basshysy Ýrsýla fon der Liaien daiyndalyp jatqan 18-shi sanktsiialar paketine de toqtaldy. Ol áli talqylaý satysynda eken. Oǵan mynalar kiredi:
- "Soltústik aǵyn" jáne "Soltústik aǵyn — 2" gaz qubyrlaryna qatysty qosymsha shekteýler;
- qara tizimge engen kemeler sanyn arttyrý;
- reseilik munai baǵasynyń tómendeýi;
- Reseidiń qarjy sektoryna qarsy jańa sanktsiialar.
"Biz prezident Pýtinge beibitshilikke kelmeiinshe, qysymdy kúsheite berýimiz kerek", - dep atap ótti fon der Liaien.
Buǵan deiin saitymyzda "Resei-Ýkraina kelissózi: Ystambulda ne bolyp jatyr?" degen material jariialanǵan bolatyn.
