Depýtat Marhabat Jaiymbetov premer-ministrdiń orynbasary – mádeniet jáne aqparat ministri Aida Balaevaǵa bilim berý salasyndaǵy júieli máseleler týraly depýtattyq saýal joldady, dep habarlaidy Dalanews.kz.
Onyń aitýynsha, qazirgi mektep júiesi barlyq balaǵa sapaly bilim berýde qiyndyqqa tap bolyp otyr, buǵan birneshe sebep bar.
"Birinshiden, shamadan tys júkteme, qaǵazbastylyq, infraqurylymnyń teńsizdigi, sondai-aq WhatsApp-taǵy chattar men tapsyrmalardyń kóptigi ustazdyń ýaqytyn alyp, oqýshymen jeke jumys isteýge múmkindik bermeidi. Qala men aýyl arasyndaǵy alshaqtyq ta aiqyn: bir aimaqta jańa mektepter salynsa, basqa óńirlerde internet pen tehnika jetispeidi", - dedi ol.
Sonymen qatar, depýtattyń pikirinshe, bilimdegi olqylyqty toltyrý úshin ata-analar balalaryn repetitorǵa berýge májbúr.
"Qazir repetitorlyqqa suranys shamamen 25 paiyzǵa ósken. Repetitor sán emes, qajettilikke ainaldy. Biraq oǵan barlyq otbasynyń múmkindigi birdei emes. Osylaisha bilim teńsizdigi kúsheiip, áleýmettik ádiletsizdik tereńdep barady. Úlken másele", - dedi ol.
Marhabat Jaiymbetovtiń sózinshe, bilim sapasy tikelei ustazǵa bailanysty.
"Qazir qaǵazbastylyqty joiamyz dep barlyq qyzmetti tsifrlandyrý protsesi júrip jatyr. Onyń ishinde pedagogterdiń attestatsiiasy men jumysqa qabyldaý rásimderi de bar. Bul, árine, tiimdi kórinýi múmkin, alaida elektron formatta ótkizilgenimen, kóbine skanerlengen qujattarmen shekteledi. Al mundai qujattardyń shynaiylyǵy bólek másele. Osy oraida bul eki rásimde de adamnyń jeke tulǵalyq qasietteri men maman retindegi shynaiy quzyrettiligin tolyq baǵalaý qiyn. Sondyqtan balaǵa bilim men tárbie berý negizgi maqsat ekenin eskere otyryp, bul rásimderge "áńgimelesý" nemese "sabaq berý" kezeńin qosý oryndy", - dedi depýtat.
