Muǵalim qyz: "Mende jeke ómir joq pa?"
Búgin men óz kásibim týraly aitqym keledi. Men muǵalimmin.
Kemshiligi:
1. Jalaqy. 50-55 myń ailyqpen uzaqqa shappaisyń. Shamań belgili. Múmkindigiń shekteýli. Qaryzǵa ómir súresiń. Qaryz alasyń, qaryz qaitarasyń. Jolymnyń ózine jalaqymnyń teń jartysy ketedi.
2. Jumys kestesi. Jumysty qai ýaqytta bastaitynyń mańyzdy emes. Tańerteń kelseń de, túste kelseń de báribir sen jumysta ómir súresiń. Máselen men 8-den túski saǵat 1-ge deiin jumys istesem de, tynysh otyrǵyzbaitynyn bilem. Túski asymdy apyl-ǵupyl ishem de bireýdiń ornyna sabaq berem. Sebebi, muǵalim múldem jetispeidi. Seniń 12 saǵat boiy tikeńneń tik turyp jumys istegeniń eshkimdi qyzyqtyrmaidy. Mektep seniń úiińe ainalady. Kózińniń asty isip ketken túrińmen júrgeniń. Mundaida óz-ózińdi kútýge shamań da, qulqyń da bolmaidy. Úzip-julyp ishken tamaǵyń densaýlyqqa áser etedi.
3. Qaǵazbastylyq. Bitpeitin esep. Josparlar. Kesteler. Eshkimge kerek emes, bir qushaq papki qushaqtap júrgeniń. Bul papkidegi aqpar komissiiaǵa arnalǵan. Al komissiiaǵa qarasań, olar osy mektepte ómir súretin siiaqty.Taýsylmaityn tekseris. Bizdiń komissiiaǵa daiyn ekenimizdi taǵy bir komissiia tekseredi. Tekserýshiler seniń synybyńdaǵy balalardyń sanynan kóp. Bir qujatyń tolyq bolmady eken, komissiia shashyńdy julady. Seni aqymaq qyp kórsetýge tyrysady. Sosyn dápter...Kóterýden sharshaisyń. Qushaǵyńa syimaidy. Synybyńda 37 bala bar bolsa, osy 37-ni 4-ke kóbeitińiz. Kóbeittińiz be, mine osynsha dápterdi arqalap júresiń, onysy óz aldyna bulardy tekserý kerek.
4. Páter aralaý. Jylyna eki ret jazda jáne jańa jyldan keiin saqyldaǵan sary aiazda páter aralap jasy 0-den 18-ge deiingi balalardy sanaqtan ótkizemiz. Qashan, qaida týdy. Qaida oqidy. Eger bizdiń mektepte oqymasa, onyń mektebine baryp, anyqtama alamyz. Árqaisymyzǵa 100-200 páterden berip qoiǵan. Bizdiń adamdar da doly ǵoi. Esigin ashpaidy, tars jaýyp alady. Boqtap tastaidy. Tiisetinder de tabylady. Osynyń bárine tózý kerek. Anyqtama jinamadyń, saǵan tiisti páterge kirmediń eken eskertý alasyń. 3 ret eskertý alsań jumystan qýyp shyǵady.
5. Syrtqy kelbetiń men jeke ómiriń... týraly jazyp ta keregi joq. Ústiń bor-bor, siia-siia, tipti ájeń de kimeitin kiimmeń júrgeniń. Jumystaǵy jurttyń deni áiel. Áiel bolǵanda da shetinen doly, ashýlanshaq kúieýge shyqpaǵan nemese jalǵyzbasty qatyndar. Ómirden qajyǵan fizrýk. Iá, seni de sondai taǵdyr kútip tur, Roksolana. Bir-eki jyl kút. Sen de solardyń kebin kiesiń. Mekteptiń otymen kirip, kúlimen shyǵyp zombiǵa ainalǵan qyzdy kim alady? Káne, kim bar? Eshkim úndemeidi ǵoi! Jigitter de qyzyq. "Qydyrmaityn, úide otyratyn qyz kerek" degende sondaisyńdar. Men klýbyń atyń estigenim bolmasa, zatyn kórgen adam emespin. Tańǵy saǵat 6-da tursam qaidaǵy klýb. Bul ýaqytta meniń qurdastarym ómirdiń qyzyǵyn kórip júr. Kigenderi keremet kóilek, opa-dalap, jasandy qas...Al men bolsam, bul ýaqytta balalardyń baqylaý jumystaryn tekserip otyram. Iá, erkekter kútimdi qyzdy jaqsy kóredi, moiyndaýym kerek. Sonda mende jeke ómir joq pa? Ol qashan paida bolady?
6. Endi jumysymnyń jaqsy jaǵy týraly aitsam. Ol bireý ǵana. Balalar. Olar seni shyn kóńilmen jaqsy kóredi. Árine, bul úshin olardyń mahabbatyna laiyqty ustaz bolýyń kerek. Mysalǵa, men siiaqty. Men mektepke kelgende, olar aldymnan shyǵady. Qushaqtaidy. Saǵynyp qalǵanyn aitady. Mine, sol kezde bul kásipti nege tańdaǵanyńdy túsinesiń. Keibir qoshaqandar qatelesip meni mama dep qoiady. Kúnderiniń qalai ótkenin áńgemelep beredi. Sen olardyń eń jaqyn dosysyń. Solai.
P.s. Eger meni osy jazba úshin jumystan shyǵaryp tastasa, meni jumysqa alyńyzdarshy.
