Májilis depýtaty Ashat Aimaǵambetov ustazdardy qorǵaityn jańa zań daiyndalǵanyn málimdedi, dep habarlaidy Dalanews.kz.
"Muǵalim mobilograf, bloger, kúzetshi nemese chat moderatory bolmaýy kerek. Onyń basty jumysy – balany oqytý. Bul týraly Memleket basshysy taǵy da basa aitty. Biz, depýtattar, "Pedagog mártebesi týraly" zańǵa túzetýler ázirlep, Úkimetke joldadyq", - dedi ol.
Depýtat birqatar ózgeristi atap ótti:
- "Eseppen kúres: qaitalanatyn esepke toqtaý. Qaǵaz ba, tsifr ma – bireýin ǵana toltyrý. Sonymen qatar, "Bir ret bir júiege engizdiń be, jetedi": Kúndelik nemese NOBD nemese Bilimland-tiń bireýine ǵana engizilgen derek birneshe júiede qaitalanbaýǵa tiis.
- Instagram / Facebook tek qalaýymen, muǵalimdi post jazýǵa nemese blog júrgizýge májbúrleýge bolmaidy. Bul tek erkimen jasalady. Chattar men habarlamalar tek resmi LMS júieleri men elektron poshtada. Muǵalim táýlik boiy chattarda arpalysyp otyratyn moderator emes.
- Jaýapkershiliktiń aiqyn shegi: mektepten tys jaǵdaiǵa muǵalim jaýap bermeidi. Ol kúzetshi de, detektiv te emes. Buǵan qosa biz "Muǵalimge tán emes fýnktsiialar" degen túsinikti zańda alǵash ret anyq jazdyq. Sonda naqty qorǵaný ońaiyraq bolady. Ol – zańdar men eńbek týraly kelisimshartta kórsetilmegen jumystyń bári.
- Mektep – ata-ana kelisimi: mektep pen ata-ana arasyndaǵy kelisimniń mártebesi kúsheiedi. Tárbie – ortaq is. Bar aýyrtpalyq muǵalimge ǵana túspeýge tiis. Endi ata-analar men mektep osy kelisimshartty qatań ustanýǵa mindetti bolady.
- Shynaiy qorǵanys: pedagog mártebesin buzǵany úshin aiyppuldar kúrt ósedi".
Aimaǵambetovtiń sózinshe, depýtattar ázirge osy baǵytta resmi qorytyndy kútip otyr.
