Ortalyqtyń ashylýy barysynda «Ál-Farabıdiń fılosofıalyq murasy» halyqaralyq ǵylymı semınary uıymdastyryldy. Farabıtanýshy ǵalymdar, Kaır ýnıversıtetiniń fılosoftary, QazUÝ rektory, akademık Ǵalym Mutanov, Mysyrdaǵy QR Elshisi Arman Isaǵalıev Shyǵystyń uly oıshyl muralary jáne óskeleń urpaqtyń rýhanı-ónegelik tárbıesindegi onyń ıdeıasynyń ózektiligi jaıly baıandamalar jasady.
Qazaqstandyq jetekshi joǵary oqý ornynyń rektory ál-Farabıdiń izgilikti qoǵam ıdeıasyna negizdelgen «İzgilikti qoǵam azamatyn qalyptastyrý. Zamanaýı ýnıversıtetter mısıasy» halyqaralyq jobasynyń BUU Órkenıetter Alánsymen birlese júzege asýy jaıly aıtty. Ol Kaır ýnıversıtetindegi ál-Farabı ortalyǵy tek ál-Farabı, Beıbarys Sultan muralaryn ǵana emes, dostas memleketter arasyndaǵy ortaq tarıhı jáne mádenı qundylyqtardy oqytyp, nasıhattaıtyn jaqsy platforma qyzmetin atqaratynyna senim bildirdi. Mysyrdaǵy Qazaqstan Elshiliginiń bastamasymen osy jyldan bastap ál-Farabı ortalyǵy bazasynda birinshi ret Kaır ýnıversıtetinde qazaq tilin oqytý páni engiziledi.
Sapar aıasynda qazaqstandyq delegasıa men Bas ımam ál-Azhar sheıh Ahmad at-Taıeb, Joǵary bilim jáne ǵylymı zertteýler mınıstri Haled Abdel-Gaffar, EAR Parlamenti bilim berý jáne ǵylymı zertteýler isteri boıynsha Komıtet tóraǵasy Samı Hashım, Kaır ýnıversıtetiniń rektory Mohammed Osman ál-Hosht jáne «Gomhýrıa» gazetiniń bas redaktory Abdel-Razek Taýfık aralarynda qurylymdyq dıalog órbidi.
Kezdesý barysynda birlese mamandar daıarlaýda ózara áriptestikti nyǵaıtý, akademıalyq almasý baǵdarlamasyn, magıstranttar men doktoranttardyń ǵylymı taǵylymdamalaryn júzege asyrý, oqytýshylar biliktiligin arttyrý, ǵylymı-bilim berý baǵdarlamalaryn jasaý, farabıtaný kýrstaryn engizý suraqtary qarastyryldy. Mysyrdan QazUÝ fılıalyn ashý jaıly kelisim is-sapardyń mańyzdy sátine aınaldy. Taraptar 2020 jyly uly oıshyl ál-Farabıdiń 1150 jyldyǵyn ótkizýge jáne daıyndyq júrgizýde birlesken jumystar jasaýǵa daıyn ekendikterin jetkizdi.
QazUÝ delegasıasy quramyndaǵy tanymal kınorejısser S. Ázimovtiń túsirý toby qazirgi ýaqytta túsirilip jatqan ál-Farabı jáne Beıbarys Sultan týraly kórkem fılmderge qajetti vıdeomaterıaldar jınaý úshin Mysyrdaǵy tarıhı-mádenı nysandardy (Beıbarys Sultan meshiti men kitaphanasy jáne t.b.) aralady.
