پرەزيدەنتتىڭ «رۋحاني جاڭعىرۋ» باعدارلاماسىن جانە «ۇلى دالانىڭ جەتى قىرى» ماقالاسىن جۇزەگە اسىرۋ اياسىندا مىسىر اراب رەسپۋبليكاسىنداعى ق ر ەلشىلىگىنىڭ قولداۋىمەن ءال-فارابي اتىنداعى قازاق ۇلتتىق ۋنيۆەرسيتەتى كاير ۋنيۆەرسيتەتىندە ءال-فارابي ءعىلىمي-بىلىم ورتالىعىن اشتى.

ورتالىقتىڭ اشىلۋى بارىسىندا «ءال-فارابيدىڭ فيلوسوفيالىق مۇراسى» حالىقارالىق عىلىمي سەمينارى ۇيىمداستىرىلدى. فارابيتانۋشى عالىمدار، كاير ۋنيۆەرسيتەتىنىڭ فيلوسوفتارى، قازۇۋ رەكتورى، اكادەميك عالىم مۇتانوۆ، مىسىرداعى ق ر ەلشىسى ارمان يساعالييەۆ شىعىستىڭ ۇلى ويشىل مۇرالارى جانە وسكەلەڭ ۇرپاقتىڭ رۋحاني-ونەگەلىك تاربيەسىندەگى ونىڭ يدەياسىنىڭ وزەكتىلىگى جايلى باياندامالار جاسادى.

قازاقستاندىق جەتەكشى جوعارى وقۋ ورنىنىڭ رەكتورى ءال-فارابيدىڭ ىزگىلىكتى قوعام يدەياسىنا نەگىزدەلگەن «ىزگىلىكتى قوعام ازاماتىن قالىپتاستىرۋ. زاماناۋي ۋنيۆەرسيتەتتەر ميسسياسى» حالىقارالىق جوباسىنىڭ بۇۇ وركەنيەتتەر اليانسىمەن بىرلەسە جۇزەگە اسۋى جايلى ايتتى. ول كاير ۋنيۆەرسيتەتىندەگى ءال-فارابي ورتالىعى تەك ءال-فارابي، بەيبارىس سۇلتان مۇرالارىن عانا ەمەس، دوستاس مەملەكەتتەر اراسىنداعى ورتاق تاريحي جانە مادەني قۇندىلىقتاردى وقىتىپ، ناسيحاتتايتىن جاقسى پلاتفورما قىزمەتىن اتقاراتىنىنا سەنىم ءبىلدىردى. مىسىرداعى قازاقستان ەلشىلىگىنىڭ باستاماسىمەن وسى جىلدان باستاپ ءال-فارابي ورتالىعى بازاسىندا ءبىرىنشى رەت كاير ۋنيۆەرسيتەتىندە قازاق ءتىلىن وقىتۋ ءپانى ەنگىزىلەدى.

ساپار اياسىندا قازاقستاندىق دەلەگاسيا مەن باس يمام ءال-ازحار شەيح احماد ات-تايەب، جوعارى ءبىلىم جانە عىلىمي زەرتتەۋلەر ءمينيسترى حالەد ابدەل-گاففار، ەار پارلامەنتى ءبىلىم بەرۋ جانە عىلىمي زەرتتەۋلەر ىستەرى بويىنشا كوميتەت ءتوراعاسى سامي حاشيم، كاير ۋنيۆەرسيتەتىنىڭ رەكتورى موحاممەد وسمان ءال-حوشت جانە «گومحۋريا» گازەتىنىڭ باس رەداكتورى ابدەل-رازەك تاۋفيك ارالارىندا قۇرىلىمدىق ديالوگ ءوربىدى.

كەزدەسۋ بارىسىندا بىرلەسە ماماندار دايارلاۋدا ءوزارا ارىپتەستىكتى نىعايتۋ، اكادەميالىق الماسۋ باعدارلاماسىن، ماگيسترانتتار مەن دوكتورانتتاردىڭ عىلىمي تاعىلىمدامالارىن جۇزەگە اسىرۋ، وقىتۋشىلار بىلىكتىلىگىن ارتتىرۋ، ءعىلىمي-بىلىم بەرۋ باعدارلامالارىن جاساۋ، فارابيتانۋ كۋرستارىن ەنگىزۋ سۇراقتارى قاراستىرىلدى. مىسىردان قازۇۋ فيليالىن اشۋ جايلى كەلىسىم ءىس-ساپاردىڭ ماڭىزدى ساتىنە اينالدى. تاراپتار 2020 جىلى ۇلى ويشىل ءال-فارابيدىڭ 1150 جىلدىعىن وتكىزۋگە جانە دايىندىق جۇرگىزۋدە بىرلەسكەن جۇمىستار جاساۋعا دايىن ەكەندىكتەرىن جەتكىزدى.

قازۇۋ دەلەگاسياسى قۇرامىنداعى تانىمال كينورەجيسسەر س. ءازىموۆتىڭ ءتۇسىرۋ توبى قازىرگى ۋاقىتتا ءتۇسىرىلىپ جاتقان ءال-فارابي جانە بەيبارىس سۇلتان تۋرالى كوركەم فيلمدەرگە قاجەتتى ۆيدەوماتەريالدار جيناۋ ءۇشىن مىسىرداعى تاريحي-مادەني نىسانداردى (بەيبارىس سۇلتان مەشىتى مەن كىتاپحاناسى جانە ت.ب.) ارالادى.