Mamai jemqorlyq qylmystarǵa qatysy bar dep Baibek týraly video jariialaǵan. Baibek ózi týraly áńgimeniń bárin ótirik dep, Mamaidyń bul tirligi jýrnalistik zertteýge jatpaitynyn málimdegen.
Aitýynsha Mamai videony Uzun Qulaq degen feik telegram-kanaldyń derekterine súienip ázirlegen. Atalǵan arna ósek-aiań taratýdan ózgeni bilmeidi. Aqparatty aýadan alyp, qaýesetti jeldei estiredi.
"Elbasy únemi aitatyn bylai dep: eger seniń aryń taza bolsa, jala japqyshtardy sotqa ber dep. Biz demokratiialyq memleket quryp kelemiz. Árbir adam óz quqyǵy, abyroiy úshin kúresýi tiis. Men de osy eldiń azamatymyn, Baýyrjan Baibek degen esimimniń bylǵanǵany maǵan unamaidy. Álgi videony meniń anam da kóredi, mysaly. Mamai siiaqty basqa da ótirikshiler men jala japqyshtarǵa sabaq bolsyn – men Mamaidy sotqa beremin! Meniń jasyratyn túgim joq, adal, taza adammyn", – degen-tin Baibek.
Muny estigen Mamai da únsiz jatqandy jón kórmepti. Baibekti ashyq debatqa shaqyrǵan oppozitsioner is sotqa jetken jaǵdaida protsestiń ádil óterine kúdikpen qaraidy.
"Ol meni sotqa beremin dep otyr ǵoi. Biraq Qazaqstanda ádiletti sot joq. Qazaqstandyq sottardyń barlyǵy Nur Otan basshylyǵy qolynda. Atqarýshy bilik ne aitady, týra sondai sheshim shyǵarady.
Sondyqtan Baibekke aitqym keledi: eger jasyratyn eshteńesi bolmasa, eger osy Nur Otan partiiasynyń jasap jatqan isteriniń barlyǵyn durys dep sanasa, onda ol menimen tikelei efirde debatqa shyqsyn.
Nur Otan-ǵa qatysty, eldiń damýyna qatysty, óziniń jemqorlyq isterine qatysty, jer daýyna qatysty osy máselelerdiń barlyǵyn tikelei efirde halyq aldynda ashyq talqylaiyq", – dep jazdy Mamai álemjelidegi paraqshasynda.
