Qazaqstannyń Týrizm jáne sport ministrligi ulttyq qurama sportshylarynyń resmi sporttyq kiimderiniń internette satylyp jatqany týraly aqparatqa qatysty túsinikteme berdi, dep habarlaidy dalanews.kz.
Ministrliktiń baspasóz hatshysy Balym Adamidenovanyń aitýynsha, ótken jyly vedomstvo alǵash ret ulttyq qurama sportshylaryn Under Armour brendi shyǵarǵan jazǵy jáne qysqy biryńǵai sporttyq kiim jiyntyǵymen qamtamasyz etken.
«Bul – Qazaqstan ulttyq quramalarynyń múshelerine arnalǵan kásibi ári sapaly sporttyq kiim. Memlekettik rámizder beinelengen árbir jiyntyq sportshylarǵa jeke beriledi jáne erkin satylymǵa shyǵarylmaidy», – dedi ol.
Vedomstvonyń málimetinshe, qazirgi ýaqytta túrli internet-platformalarda ulttyq quramanyń resmi sporttyq kiimine uqsas ónimder satylyp jatyr. Alaida olardyń resmi formaǵa eshqandai qatysy joq.
Ministrlik ókilderi Under Armour brendi shyǵarǵan túpnusqa sporttyq kiimderdi kompaniianyń resmi dúkenderinen satyp alýǵa bolatynyn atap ótti. Degenmen Qazaqstannyń memlekettik rámizderi men ulttyq qurama belgileri beinelengen ónimder bólshek saýdada satylmaidy.
Sondai-aq Under Armour kompaniiasy brendti zańsyz paidalanýǵa jáne kontrafaktilik ónimderdi taratýǵa qatysty quqyqtyq sharalar qabyldap jatqany habarlandy. Osyǵan bailanysty Týrizm jáne sport ministrligi azamattardy saq bolýǵa shaqyryp, ulttyq quramanyń resmi sporttyq kiimi retinde usynylatyn kúmándi ónimderdi satyp almaýǵa keńes berdi.
