قازاقستاننىڭ تۋريزم جەنە سپورت مينيسترلٸگٸ ۇلتتىق قۇراما سپورتشىلارىنىڭ رەسمي سپورتتىق كيٸمدەرٸنٸڭ ينتەرنەتتە ساتىلىپ جاتقانى تۋرالى اقپاراتقا قاتىستى تٷسٸنٸكتەمە بەردٸ, دەپ حابارلايدى dalanews.kz.
مينيسترلٸكتٸڭ باسپاسٶز حاتشىسى بالىم اداميدەنوۆانىڭ ايتۋىنشا, ٶتكەن جىلى ۆەدومستۆو العاش رەت ۇلتتىق قۇراما سپورتشىلارىن Under Armour برەندٸ شىعارعان جازعى جەنە قىسقى بٸرىڭعاي سپورتتىق كيٸم جيىنتىعىمەن قامتاماسىز ەتكەن.
«بۇل – قازاقستان ۇلتتىق قۇرامالارىنىڭ مٷشەلەرٸنە ارنالعان كەسٸبي ەرٸ ساپالى سپورتتىق كيٸم. مەملەكەتتٸك رەمٸزدەر بەينەلەنگەن ەربٸر جيىنتىق سپورتشىلارعا جەكە بەرٸلەدٸ جەنە ەركٸن ساتىلىمعا شىعارىلمايدى», – دەدٸ ول.
ۆەدومستۆونىڭ مەلٸمەتٸنشە, قازٸرگٸ ۋاقىتتا تٷرلٸ ينتەرنەت-پلاتفورمالاردا ۇلتتىق قۇرامانىڭ رەسمي سپورتتىق كيٸمٸنە ۇقساس ٶنٸمدەر ساتىلىپ جاتىر. الايدا ولاردىڭ رەسمي فورماعا ەشقانداي قاتىسى جوق.
مينيسترلٸك ٶكٸلدەرٸ Under Armour برەندٸ شىعارعان تٷپنۇسقا سپورتتىق كيٸمدەردٸ كومپانييانىڭ رەسمي دٷكەندەرٸنەن ساتىپ الۋعا بولاتىنىن اتاپ ٶتتٸ. دەگەنمەن قازاقستاننىڭ مەملەكەتتٸك رەمٸزدەرٸ مەن ۇلتتىق قۇراما بەلگٸلەرٸ بەينەلەنگەن ٶنٸمدەر بٶلشەك ساۋدادا ساتىلمايدى.
سونداي-اق Under Armour كومپانيياسى برەندتٸ زاڭسىز پايدالانۋعا جەنە كونترافاكتٸلٸك ٶنٸمدەردٸ تاراتۋعا قاتىستى قۇقىقتىق شارالار قابىلداپ جاتقانى حابارلاندى. وسىعان بايلانىستى تۋريزم جەنە سپورت مينيسترلٸگٸ ازاماتتاردى ساق بولۋعا شاقىرىپ, ۇلتتىق قۇرامانىڭ رەسمي سپورتتىق كيٸمٸ رەتٸندە ۇسىنىلاتىن كٷمەندٸ ٶنٸمدەردٸ ساتىپ الماۋعا كەڭەس بەردٸ.
