Týrizm jáne sport ministri Erbol Myrzabosynov 9 maýsymda Úkimettegi baspasóz máslihatynda Densaýlyq saqtaý ministrliginiń kaliandy zańdastyrý týraly bastamasyna qatysty pikir bildirdi, dep habarlaidy dalanews.kz.
Qazirgi ýaqytta Densaýlyq saqtaý ministrligi tiisti zań jobasyn ázirlep jatyr. Osyǵan bailanysty jýrnalister Týrizm jáne sport ministrliginiń ustanymyn surady.
Erbol Myrzabosynov qoldanystaǵy zańnamaǵa sáikes qoǵamdyq oryndarda kalian shegýge tyiym salynǵanyn eske saldy.
«Zań boiynsha qoǵamdyq oryndarda kalian shegýge tyiym salynǵan. Biz óz tarapymyzdan ony tutynýǵa qarsymyz. Biz salaýatty ómir saltyn qoldaimyz, dene belsendiligin jaqtaimyz», – dedi ministr.
Aita keteiik, buǵan deiin Ishki ister ministriniń orynbasary Sanjar Ádilov Qazaqstanda kalianǵa qatysty qoldanystaǵy tyiymdy jeńildetý múmkindigi qarastyrylyp jatqanyn rastaǵan bolatyn.
Onyń aitýynsha, bul másele memlekettik organdar deńgeiinde talqylanyp jatyr. Alaida kaliandy zańdastyrýǵa qatysty túpkilikti sheshim ázirge qabyldanǵan joq.
