"Qańtar tragediiasynyń bolaryn bilip, shetelge taiyp turdy" degen Rinat Zaiytovtyń málimdemesiniń ystyǵy basylsa da, eks-depýtat buǵan qatysty pikir bildirýin doǵarar emes.
Bul joly álemjelidegi oqyrmandarymen dialog qurǵan Tileýhan atyshýly aitysker aqynnyń aiyptaýyn teriske shyǵaryp, sondai-aq Túrkiiaǵa ne sebepti ketkenin túsindirdi.
Eldi mazalaǵan saýaldarǵa Tileýhan Instagram arqyly jaýap beripti.
“Qańtar oqiǵasynyń bolatynyn bildińiz be?" degen saýalǵa Tileýhan:
"Qaidan bilesiń ondai zulmatty?! Qandy qańtardy men túgili, múiizi qaraǵaidai sarapshylar da boljai alǵan joq.
Al "Bekbolat bildi, bilgen soń ketti" degen jala ol endi qanquily dushpandarymnyń ólimge qiǵan ósegi!
Gebbelstiń "chem chýdovishnee loj, tem ohotnee v nee veriat i tem bystree ona rasprostroniaetsia" degen saiasi tehnologtar kúni búginge deiin qarý etken qaraý tásili bar. Sol tásildi taǵy da maǵan jantalasa qoldanyp jatyr, birine biri dop oinaǵandai tas tastap", - dedi.
Tildesý barysynda ol Túrkiiaǵa ne úshin ketkenin túsindirdi.
"2021 jyldyń qyrkúiek aiynda Búkilálemdik etnosport konfederatsiiasy tarapynan (prezidenti Bilál Erdoǵan) maǵan qyzmetke usynys tústi. Qazaq eliniń atynan osyndai mártebeli qyzmetti atqarý - úlken abyroi jáne el imidjine de paidasy zor dep bildik.
Osyǵan orai, men jeltoqsan aiynyń sońynda depýtattyq mandatymdy tapsyryp, az ýaqyttyq demalystan keiin aqpan aiynda Stambul qalasyndaǵy qyzmetime kiristim. Sodan beri halyqaralyq uiymda qyzmet etip jatyrmyn", - dep málimdedi ol.
Tileýhannyń aitýynsha, qazirgi ýaqytta birneshe uiymdasqan top onyń eks-depýtattyń esimin qaralaýmen ainalysýda.
"Bekbolat Tileýhandy qaralaý protsesi kádimgi ǵylymi júiemen iske asty. Bul ispen birli jarym toptar emes, kádimgi birneshe institýt júieli túrde iske kiristi.
Budan ondaǵan jyldar burynǵy suhbattardyń ár sózin súzip, saraptap, montajdap, jaryqqa shyǵarý.. Onyń bári ýaqyt, onyń bári qarjy. Ár sózińdi jai ǵana mazaqtap qana qoimai, grimmen, saqal japsyryp, shashyn kelistirip, dybysty týralap, kásibi akterlerdi tartyp, virýstyq videolar daiyndaý. Onyń bári ýaqyt, onyń bári qyrýar qarjy", - deidi ol.
