"قاڭتار تراگەدياسىنىڭ بولارىن ءبىلىپ، شەتەلگە تايىپ تۇردى" دەگەن رينات زايىتوۆتىڭ مالىمدەمەسىنىڭ ىستىعى باسىلسا دا، ەكس-دەپۋتات بۇعان قاتىستى پىكىر ءبىلدىرۋىن دوعارار ەمەس.
بۇل جولى الەمجەلىدەگى وقىرماندارىمەن ديالوگ قۇرعان تىلەۋحان اتىشۋلى ايتىسكەر اقىننىڭ ايىپتاۋىن تەرىسكە شىعارىپ، سونداي-اق تۇركياعا نە سەبەپتى كەتكەنىن ءتۇسىندىردى.
ەلدى مازالاعان ساۋالدارعا تىلەۋحان Instagram ارقىلى جاۋاپ بەرىپتى.
“قاڭتار وقيعاسىنىڭ بولاتىنىن ءبىلدىڭىز بە؟" دەگەن ساۋالعا تىلەۋحان:
"قايدان بىلەسىڭ ونداي زۇلماتتى؟! قاندى قاڭتاردى مەن تۇگىلى، ءمۇيىزى قاراعايداي ساراپشىلار دا بولجاي العان جوق.
ال "بەكبولات ءبىلدى، بىلگەن سوڭ كەتتى" دەگەن جالا ول ەندى قانقۇيلى دۇشپاندارىمنىڭ ولىمگە قيعان وسەگى!
گەببەلستىڭ "چەم چۋدوۆيششنەە لوج، تەم وحوتنەە ۆ نەە ۆەريات ي تەم بىسترەە ونا راسپروسترونياەتسيا" دەگەن ساياسي تەحنولوگتار كۇنى بۇگىنگە دەيىن قارۋ ەتكەن قاراۋ ءتاسىلى بار. سول ءتاسىلدى تاعى دا ماعان جانتالاسا قولدانىپ جاتىر، بىرىنە ءبىرى دوپ ويناعانداي تاس تاستاپ"، - دەدى.
تىلدەسۋ بارىسىندا ول تۇركياعا نە ءۇشىن كەتكەنىن ءتۇسىندىردى.
"2021 جىلدىڭ قىركۇيەك ايىندا بۇكىلالەمدىك ەتنوسپورت كونفەدەراسياسى تاراپىنان (پرەزيدەنتى ءبىلال ەردوعان) ماعان قىزمەتكە ۇسىنىس ءتۇستى. قازاق ەلىنىڭ اتىنان وسىنداي مارتەبەلى قىزمەتتى اتقارۋ - ۇلكەن ابىروي جانە ەل يميدجىنە دە پايداسى زور دەپ بىلدىك.
وسىعان وراي، مەن جەلتوقسان ايىنىڭ سوڭىندا دەپۋتاتتىق مانداتىمدى تاپسىرىپ، از ۋاقىتتىق دەمالىستان كەيىن اقپان ايىندا ستامبۇل قالاسىنداعى قىزمەتىمە كىرىستىم. سودان بەرى حالىقارالىق ۇيىمدا قىزمەت ەتىپ جاتىرمىن"، - دەپ مالىمدەدى ول.
تىلەۋحاننىڭ ايتۋىنشا، قازىرگى ۋاقىتتا بىرنەشە ۇيىمداسقان توپ ونىڭ ەكس-دەپۋتاتتىڭ ەسىمىن قارالاۋمەن اينالىسۋدا.
"بەكبولات تىلەۋحاندى قارالاۋ پروسەسى كادىمگى عىلىمي جۇيەمەن ىسكە استى. بۇل ىسپەن ءبىرلى جارىم توپتار ەمەس، كادىمگى بىرنەشە ينستيتۋت جۇيەلى تۇردە ىسكە كىرىستى.
بۇدان ونداعان جىلدار بۇرىنعى سۇحباتتاردىڭ ءار ءسوزىن ءسۇزىپ، ساراپتاپ، مونتاجداپ، جارىققا شىعارۋ.. ونىڭ ءبارى ۋاقىت، ونىڭ ءبارى قارجى. ءار ءسوزىڭدى جاي عانا مازاقتاپ قانا قويماي، گريممەن، ساقال جاپسىرىپ، شاشىن كەلىستىرىپ، دىبىستى تۋرالاپ، كاسىبي اكتەرلەردى تارتىپ، ۆيرۋستىق ۆيدەولار دايىنداۋ. ونىڭ ءبارى ۋاقىت، ونىڭ ءبارى قىرۋار قارجى"، - دەيدى ول.
