Aqtaýda boijetkenge qoqan-loqy kórsetip, sońynan qýǵan er adamǵa qatysty qylmystyq is qozǵaldy, dep habarlaidy Dalanews.
Áleýmettik jelilerde taraǵan beinejazbalarda er adamnyń boijetkendi kúshtep ustap turǵany, al qyzdyń onyń qolynan bosap shyǵýǵa tyrysqany kórinedi. Oqiǵa kýágerleri aralasyp, janjaldyń ýshyǵýyna jol bermegen. Taǵy bir videoda er adamnyń boijetkenge «Seni zorlaimyn» dep qoqan-loqy kórsetkeni estiledi.
Aldyn ala málimet boiynsha, oqiǵa 2 tamyz kúni tańǵy saǵat 08:00 shamasynda Aqtaý qalasynyń jaǵalaýynda bolǵan. Keiin janjal joldyń júris bóligine ulasqan. Boijetken er adamnan qashyp, ótip bara jatqan kólikterdiń birine mingen. Alaida er adam onyń sońynan qýyp jetip, kóliktiń esiginen ustap qalǵan. Osy sátte júrgizýshi kólikten túsip, qyzǵa kómek kórsetýge umtylǵan, al ózge kýágerler boijetkendi qaýipsiz jerge alyp ketýdi suraǵan.
Mańǵystaý oblysy politsiia departamentiniń málimetinshe, oqiǵaǵa qatysy bar barlyq tulǵalardyń jeke basy anyqtalǵan. Olar Aqtaý qalalyq politsiia basqarmasyna jetkizilip, ýaqytsha ustaý izoliatoryna qamalǵan.
Politsiia atalǵan derek boiynsha qylmystyq is qozǵalǵanyn habarlady. Qazirgi ýaqytta oqiǵanyń barlyq mán-jaiyn anyqtaýǵa baǵyttalǵan tergeý jáne protsessýaldyq áreketter júrgizilip jatyr. Quqyq qorǵaý organdary qylmystyq is aiasynda quqyqtyq baǵa beriletinin málimdedi.
