Depýtat jalpy sipattaǵy transfertterdi esepteý únemi jetildirilip otyratynyn, jańa tásilder qoldanylatynyn, biraq problemalyq máseleler áli de saqtalyp otyrǵanyn atap ótti.
Orynbekovtyń aitýynsha, ol ortalyq memlekettik organdarmen jobalardy kelisý kezinde aiqyn kórinedi, onyń rásimi 6 aiǵa deiin sozylýy múmkin. Nátijesinde, jumys is júzinde bastalǵansha, olardyń baǵasy da ósip ketedi.
– Otandyq biýdjet júiesinde tórt deńgei bolǵandyqtan, óńirdegi bir obektini qarjylandyrý biýdjettiń úsh deńgeiinde birden – respýblikalyq, oblystyq jáne aýdandyq deńgeide júzege asýy múmkin. Mundai nysandardy josparlaý ýaqyt óte kele sozyla beredi. Óitkeni jobany biýdjettiń ár deńgeiinde de qorǵaýy kerek. Osylaisha, shyǵyndardy josparlaý men negizdeýge, memlekettik saraptamanyń qorytyndysyn alýǵa jáne qandai da bir obekt boiynsha merdigerdi anyqtaýǵa 2 jylǵa deiin ýaqyt ketýi múmkin. Osy ýaqyt ishinde naryqtaǵy jaǵdai men baǵa aitarlyqtai ózgerýi yqtimal. Sonda shyǵyndardy túzetý qajet bolady, al kez kelgen ózgerister qaitadan birneshe ret kelisýdi qajet etedi, – dedi senator.
Depýtat sondai-aq ortalyq memlekettik organdardyń jergilikti biýdjetterden joǵary turǵan biýdjetten ótemaqysyz qosymsha shyǵyndardy kózdeitin NQA qabyldaýyn nazardan tys qaldyrmady. Ol bul tásil jergilikti atqarýshy organdardyń óńirlik ekonomikany damytý jónindegi bastamasyn tejeitinin atap ótti.
– Shynynda da, eger ortalyq atqarýshy organdar bul qosymsha kiristerdi óz qalaýy boiynsha qaita bólse, nege óńirler ózderiniń biýdjettik kiristerin arttyrýǵa tyrysady. Jergilikti jáne ortalyq atqarýshy organdardyń múddeler qaqtyǵysy kórinip tur, – dedi Bekbolat Orynbekov.
Senator osyǵan bailanysty Úkimetti biýdjetaralyq qatynastardy jetildirý jónindegi jumysty kúsheitýge shaqyrdy.
Sondai-aq zańmen bekitilgen transfertter somasyn qatań ustaný jáne biýdjet salasyndaǵy barlyq sheshimderdi óńirlerdiń derbestigi men riiasyz qyzmetin arttyrýdaǵy basymdyq qaǵidatyn negizge ala otyryp qabyldaý qajettigin atap ótti.
