Búginde elimizdiń túkpir-túkpirinde tabysty júzege asyp jatqan «Jumyspen qamtýdyń jol kartasy – 2020» baǵdarlamasyn alyp qarasańyz, birinshi kezekte aýyl-aımaqtaǵy jastar osy jobanyń arqasynda jumyspen qamtylyp jatqanyn baıqaýǵa bolady. Budan basqa, jastar arasynda kásipkerlikti damytý baǵytynda qyrýar jumystar atqarylyp, bızneske ańsary aýǵan jastarǵa túrli jeńildetilgen nesıeler berilip, tipti olardyń kásipkerlik salanyń qyry men syryn úırenýi úshin semınarlar men trenıńter uıymdastyrylyp jatqanyn atap aıtýǵa bolady. Osylaısha, memleketimiz kez kelgen baǵdarlamanyń aıasynda jalyndy jastarǵa barynsha qoldaý kórsetip, qamqorlyq jasap keledi dep nyq senimmen aıtýǵa bolady.
Osy rette QR Aqparat jáne qoǵamdyq damý vıse-mınıstri Ashat Oralov:
– Búginde álemdi apshysyna salyp qýyrǵan pandemıa barlyq eldiń áleýmettik-ekonomıkalyq damýyna kóptegen ózgerister engizdi. Óz kezeginde Memleket basshysy Qasym-Jomart Toqaev osyndaı qıyn kezeńde memlekettiń ósip-órkendeýin bir sátke de toqtatpaý úshin batyl sheshimder qabyldap, elimizdiń alǵa qadam basýyna bar kúsh-jigerin jumsaýda. Sonymen qatar memlekettik basqarý organdarynan osy baǵytta jumys isteýdi talap etip otyr. Osy rette Prezıdentimiz elimizde adam kapıtalyn damytýdy, sonyń ishinde óskeleń jas urpaqtyń qandaı qıyn kezeń bolsa da sapaly bilim alýyna, ózderiniń arman-murattaryn iske asyrýyna basa kóńil bólip otyr. Sol sebepti jastardyń memlekettik saıasatyn júzege asyrý mańyzdy strategıalyq baǵyttardyń birine aınalyp otyr, – degen Ashat Oralov memleketimiz jastar saıasatyn damytýǵa aıryqsha mán beretinin aıtqan bolatyn.
«Jastar jáne ınovasıa» dep atalatyn onlaın forýmda oıyn ortaǵa salǵan QR Aqparat jáne qoǵamdyq damý vıse-mınıstri Ashat Oralov qazirgi tańda «Jol kartasy» boıynsha júzege asyp jatqan túrli baǵdarlama men jobalarda jastarǵa qoldaý kórsetilip, olardyń oı-armandary shetinen júzege asyp jatqanyn aıtty.
Sońǵy ýaqyttary ǵylymmen aınalysqan jastarǵa memleket tarapynan aıryqsha qoldaý kórsetilip keledi. Aıtalyq, «Jastar jyly» aıasynda Qazaqstannyń ǵylymyn damytýǵa den qoıǵan jas ǵalymdarǵa Nur-Sultan men Almaty qalasynda baspana berilgenin aıta ketýge bolady. Budan basqa, olardyń ǵylymı-zertteý jumystarymen alańsyz aınalysýy úshin Úkimet 3 mlrd teńge bólip, 169 jas osy grantqa qol jetkizip, ózderiniń ǵylymı jumystaryn damytýǵa múmkindik alǵanyn aıta ketýimiz kerek.
Memleket erkin oıly jastardy qoldaý baǵytyndaǵy jumystardy kúsheıtken sátte elimizdegi jastar uıymy da maqsat údesinen shyǵa bilýde. Osy rette «Azamattyq bastamalardy qoldaý ortalyǵy» uıymy uzyn sany júzge jetetin jastardyń áleýmettik jobalaryna joǵary deńgeıde baǵalap, olardyń qoǵamdyq belsendiliginiń damýyna barynsha qoldaý kórsetip otyr. Uıym jetekshisi Batıma Mýkına jastardyń áleýmettik jobasyn júzege asyrýǵa eki mıllıard teńgege jýyq qarjy jumalǵanyn alǵa tartqan bolatyn.
Memleket basshysy Qasym-Jomart Toqaevtyń elimizde eriktilerdi yntalandyrýǵa baǵyttalǵan qoldaýy jastardyń qoǵamdyq sanasynyń jańǵyrýyna aıryqsha yqpal etip, pandemıa kezinde olardyń azamattyq pozısıasy anyq baıqaldy dep aıtýǵa bolady.
– Prezıdentimiz Qasym-Jomart Toqaevtyń bastamasymen qolǵa alynǵan Eriktiler jylynda kóptegen jumystar atqaryldy. Atap aıtsaq, dál osy jyly kóptegen baǵyttar boıynsha eriktiler daıyndalyp, qoǵamdyq sananyń jańǵyrýyna yqpal etti. Aıtalyq, az ǵana ýaqyttyń ishinde aýyldy jerde turatyn 14 myńnan astam mektep bitirýshilerdi Ulttyq biryńǵaı testileýge qatysty júzdegen eriktiler daıyndaldy. Osy eriktiler aýyl balalarynyń aǵylshyn tilin meńgerýin jáne quqyqtyq saýattylyǵyn arttyrýǵa bar kúsh-jigerin jumsady. Al pandemıa kezindegi eriktilerdiń erlikke para-par jumystary jaıynda, aýyz toltyryp, zor maqtanyshpen jáne asa rızashylyqpen aıtýǵa bolady. Osylaısha, Erktiler jyly qazaq jastarynyń ózderin qoǵamnyń bólshegi retinde sezinýine yqpal etti, – dep Azamattyq bastamalar ortalyǵynyń jetekshisi Batıma Mýkına oıyn ortaǵa saldy.
Mine, memlekettiń qoldaýynyń arqasynda jastarymyz ultjandy azamat retinde qalyptasyp kele jatqanyn baıqaýǵa bolady. Aldaǵy ýaqytta da bul baǵyttaǵy jumystar jalǵasyn taýyp, qazaq jastary osyndaı qoldaý men qamqorlyqtyń arqasynda qoǵamdyq ómirimizden óz oryndaryn taýyp, elimizdi damytýǵa óz kúshterin jumsaıtyn bolady.
Tolqyn SADYROVA
