Prezident Ákimshiliginiń Basshysy Aibek Arqabaiuly Dádebaev elimizde oryn alǵan sý tasqynyn saldaryn joiý, shetelden qaitarylǵan aktivter, tildik ahýal, kadrlar daiyndaý siiaqty qoǵamdaǵy birqatar mańyzdy máselelerge qatysty suhbat berdi, - dep habarlaidy Dalanews.kz.
Prezident Ákimshiliginiń Basshysy memlekettik tilge qatysty Prezidentimizdiń ustanymy belgili dep aitty.
«Qasym-Jomart Kemeluly – naǵyz til janashyry. Sondyqtan Prezidentimizdiń saiasaty – memlekettik tildiń damýyna naqty ispen qoldaý kórsetý jáne bul salada qandai da bir spekýliatsiia men arandatýǵa jol bermeý» – deidi ol.
A. Dádebaev memleketimizdiń negizgi zańy – Ata zańymyzǵa sáikes elimizde eshkimdi sóileitin tiline bailanysty kemsitýge, qýdalaýǵa nemese qandai da bir qysym jasaýǵa jol berilmeitinin eske saldy.
«Qazir til máselesin kúrdelendirip, tipti saiasi oiynǵa ainaldyrǵysy keletinder de bar. Máselen, elimizde tilge qatysty jurtty daýryqtyryp, ult bolashaǵyna qaýip tóndiretin másele týdyryp júrgenderdi baiqaimyz. Bul – ulttyq qaýipsizdigimizge keri áser etetin jait. Qai turǵydan qarasaq ta tildik másele názik, asa jaýapkershilikpen kelýdi talap etedi» – deidi Aibek Arqabaiuly.
Elimizde kóptegen etnos ókilderi turatynyn eskere otyryp, qazirdiń ózinde ana tilimizde erkin sóileitinder qatary kóbeiip keledi eken. Áleýmettanýlyq zertteýlerge sáikes, qazir eldegi memlekettik tildi meńgergen azamattar sany 81%-dan asqan.
«Jalpy, bizdiń elde memlekettik tilge, onyń qoldaný aiasynyń keńeiýine airyqsha mán beriledi. Bul – elimiz búgingi tańda júrgizip otyrǵan astary asa tereń saiasat. Naqty formýlasy – kóptildi qoǵam, jalǵyz memlekettik tili bar el! Iaǵni, onyń mańyzdy komponenti – tildik tózimdilik, jańasha aitsaq, tildik toleranttyq. «Jyly-jyly sóileseń...» degen halyq naqyly qashanda jadymyzda bolǵany jón. Eldiń baiandy bolashaǵy degen qasterli iste qandai másele bolsyn sabyrmen, aqylǵa salyp sheshetin bizdiń eldiń azamattary úshin bul qoldan keletin sharýa. Bizdiń aldyńǵy býynnyń da ósiet etkeni osy» – deidi Prezident Ákimshiliginiń Basshysy A. Dádebaev.
«Qoǵamda tilge qatysty arandatýlar bolǵan jaǵdaida, elimizdiń ár azamatyna eskertip aitatyn jáit, ol arandatýǵa qosylmańyzdar. Birneshe tildi meńgerý, qazaq halqy árdaiym saýatty bolsyn degen ustanymdamyz ári tildi saiasi suraqqa ainaldyrýǵa qarsy ekenimizdi ashyp aitamyn» – dep el azamattaryna eskertý aitty.
Óitkeni, Aibek Dádebaevtyń aitýynsha, til taqyryby kóptegen memleketter arasynda qaqtyǵystarǵa sebep bolyp otyrǵan basty faktorlardyń biri. Sondyqtan ol beibit bolashaq úshin neniń durys, neniń burys ekenine naqty kóz jetkizbei turyp, túrli arandatýǵa qosylmaýdy surady. Mundai arandatýshylar zań boiynsha jaýap beretin bolady.
«Bile bilsek, tildik tózimdilik – qala berdi memlekettik, iaǵni eldik qaýipsizdigimizdiń kepili» – dep túiindedi ol memlekettik tilge qatysty jaýabyn.
