پرەزيدەنت اكىمشىلىگىنىڭ باسشىسى ايبەك ارقاباي ۇلى دادەبايەۆ ەلىمىزدە ورىن العان سۋ تاسقىنىن سالدارىن جويۋ، شەتەلدەن قايتارىلعان اكتيۆتەر، تىلدىك احۋال، كادرلار دايىنداۋ سياقتى قوعامداعى ءبىرقاتار ماڭىزدى ماسەلەلەرگە قاتىستى سۇحبات بەردى، - دەپ حابارلايدى Dalanews.kz.
پرەزيدەنت اكىمشىلىگىنىڭ باسشىسى مەملەكەتتىك تىلگە قاتىستى پرەزيدەنتىمىزدىڭ ۇستانىمى بەلگىلى دەپ ايتتى.
«قاسىم-جومارت كەمەل ۇلى – ناعىز ءتىل جاناشىرى. سوندىقتان پرەزيدەنتىمىزدىڭ ساياساتى – مەملەكەتتىك ءتىلدىڭ دامۋىنا ناقتى ىسپەن قولداۋ كورسەتۋ جانە بۇل سالادا قانداي دا ءبىر سپەكۋلياسيا مەن ارانداتۋعا جول بەرمەۋ» – دەيدى ول.
ا. دادەبايەۆ مەملەكەتىمىزدىڭ نەگىزگى زاڭى – اتا زاڭىمىزعا سايكەس ەلىمىزدە ەشكىمدى سويلەيتىن تىلىنە بايلانىستى كەمسىتۋگە، قۋدالاۋعا نەمەسە قانداي دا ءبىر قىسىم جاساۋعا جول بەرىلمەيتىنىن ەسكە سالدى.
«ءقازىر ءتىل ماسەلەسىن كۇردەلەندىرىپ، ءتىپتى ساياسي ويىنعا اينالدىرعىسى كەلەتىندەر دە بار. ماسەلەن، ەلىمىزدە تىلگە قاتىستى جۇرتتى داۋرىقتىرىپ، ۇلت بولاشاعىنا ءقاۋىپ توندىرەتىن ماسەلە تۋدىرىپ جۇرگەندەردى بايقايمىز. بۇل – ۇلتتىق قاۋىپسىزدىگىمىزگە كەرى اسەر ەتەتىن جايت. قاي تۇرعىدان قاراساق تا تىلدىك ماسەلە نازىك، اسا جاۋاپكەرشىلىكپەن كەلۋدى تالاپ ەتەدى» – دەيدى ايبەك ارقاباي ۇلى.
ەلىمىزدە كوپتەگەن ەتنوس وكىلدەرى تۇراتىنىن ەسكەرە وتىرىپ، ءقازىردىڭ وزىندە انا تىلىمىزدە ەركىن سويلەيتىندەر قاتارى كوبەيىپ كەلەدى ەكەن. الەۋمەتتانۋلىق زەرتتەۋلەرگە سايكەس، ءقازىر ەلدەگى مەملەكەتتىك ءتىلدى مەڭگەرگەن ازاماتتار سانى 81%-دان اسقان.
«جالپى، ءبىزدىڭ ەلدە مەملەكەتتىك تىلگە، ونىڭ قولدانۋ اياسىنىڭ كەڭەيۋىنە ايرىقشا ءمان بەرىلەدى. بۇل – ەلىمىز بۇگىنگى تاڭدا جۇرگىزىپ وتىرعان استارى اسا تەرەڭ ساياسات. ناقتى فورمۋلاسى – كوپتىلدى قوعام، جالعىز مەملەكەتتىك ءتىلى بار ەل! ياعني، ونىڭ ماڭىزدى كومپونەنتى – تىلدىك توزىمدىلىك، جاڭاشا ايتساق، تىلدىك تولەرانتتىق. «جىلى-جىلى سويلەسەڭ...» دەگەن حالىق ناقىلى قاشاندا جادىمىزدا بولعانى ءجون. ەلدىڭ باياندى بولاشاعى دەگەن قاستەرلى ىستە قانداي ماسەلە بولسىن سابىرمەن، اقىلعا سالىپ شەشەتىن ءبىزدىڭ ەلدىڭ ازاماتتارى ءۇشىن بۇل قولدان كەلەتىن شارۋا. ءبىزدىڭ الدىڭعى بۋىننىڭ دا وسيەت ەتكەنى وسى» – دەيدى پرەزيدەنت اكىمشىلىگىنىڭ باسشىسى ا. دادەبايەۆ.
«قوعامدا تىلگە قاتىستى ارانداتۋلار بولعان جاعدايدا، ەلىمىزدىڭ ءار ازاماتىنا ەسكەرتىپ ايتاتىن ءجايت، ول ارانداتۋعا قوسىلماڭىزدار. بىرنەشە ءتىلدى مەڭگەرۋ، قازاق حالقى ءاردايىم ساۋاتتى بولسىن دەگەن ۇستانىمدامىز ءارى ءتىلدى ساياسي سۇراققا اينالدىرۋعا قارسى ەكەنىمىزدى اشىپ ايتامىن» – دەپ ەل ازاماتتارىنا ەسكەرتۋ ايتتى.
ويتكەنى، ايبەك دادەبايەۆتىڭ ايتۋىنشا، ءتىل تاقىرىبى كوپتەگەن مەملەكەتتەر اراسىندا قاقتىعىستارعا سەبەپ بولىپ وتىرعان باستى فاكتورلاردىڭ ءبىرى. سوندىقتان ول بەيبىت بولاشاق ءۇشىن نەنىڭ دۇرىس، نەنىڭ بۇرىس ەكەنىنە ناقتى كوز جەتكىزبەي تۇرىپ، ءتۇرلى ارانداتۋعا قوسىلماۋدى سۇرادى. مۇنداي ارانداتۋشىلار زاڭ بويىنشا جاۋاپ بەرەتىن بولادى.
«بىلە بىلسەك، تىلدىك توزىمدىلىك – قالا بەردى مەملەكەتتىك، ياعني ەلدىك قاۋىپسىزدىگىمىزدىڭ كەپىلى» – دەپ تۇيىندەدى ول مەملەكەتتىك تىلگە قاتىستى جاۋابىن.
