QR Eńbek jáne halyqty áleýmettik qorǵaý ministrligi jumysynan aiyrylǵan azamattarǵa qatysty mańyzdy aqparatpen bólisti. Olarǵa "Memlekettik áleýmettik saqtandyrý qory" AQ arqyly tólem alýǵa bolatyny eske salyndy, dep habarlaidy Dalanews.kz.
"MÁSQ" AQ ótinishterdi qaraý departamentiniń direktory Samal Toqsanǵazina jumysynan airylý jaǵdaiy boiynsha MÁSQ-dan tólem alýǵa kimder úmitti bola alatynyn jáne ol qandai somada aqsha alatynyn aitty:
"Ýaqytsha jumyssyz qalǵan qazaqstandyqtardy qoldaý úshin jańa jumys ornyn izdeý kezeńinde memlekettik áleýmettik saqtandyrý qorynan tólem qarastyrylǵan... Bul tólem jumystan bosaý sebepterine qaramastan júzege asyrylady jáne jumys izdeý kezeńinde jumyssyz adamdy qoldaýǵa arnalǵan. Tólem mólsheri men merzimi jekelei esepteledi jáne sońǵy 2 jyldaǵy ortasha ailyq tabysyńyzǵa jáne júiege qatysý ótiline (mindetti áleýmettik saqtandyrý) bailanysty, tólem merzimi 1 aidan 6 aiǵa deiingi aralyqty qamtidy".
Ony alýdyń basty sharty - mindetti áleýmettik saqtandyrý júiesine qatysý jáne jumyssyz retinde resmi tirkelý.
"Enbek.kz jáne egov.kz nemese mansap ortalyǵy portaldarynda jumyssyz retinde tirkelý kezinde tólem taǵaiyndaýǵa ótinim berýge bolady. Al eger siz jumyssyz retinde tirkelip qoiǵan bolsańyz, onda egov.kz portalynda, ekinshi deńgeidegi bankterdiń mobildik qosymshalary arqyly nemese HQKO-da ótinish berýge bolady", - deidi Samal Toqsanǵazina.
Onyń aitýynsha, ýaqytsha jumyssyz qalǵan qazaqstandyqtar úshin mynany este ustaǵan jón: jumyssyz retinde tirkelgen sátten bastap 12 ai ishinde tólem alýǵa júginý qajet.
2025 jylǵy 1 shildedegi jaǵdai boiynsha Memlekettik áleýmettik saqtandyrý qorynan (MÁSQ) jumysynan aiyrylýyna bailanysty 220,9 myń qazaqstandyq áleýmettik tólem aldy. Eńbek ministrliginiń málimetinshe, tólemderdiń jalpy somasy 62,2 mlrd teńgeni qurady.
