Jarysqa qatysýshylardy oblys ákimi A. Batalov quttyqtap, sáttilik tiledi.
– Bul jarysty memlekettik qyzmetshilerdiń kásibi merekesine orai jyl saiyn ótkizý dástúrge ainalǵan. Óitkeni memlekettik basqarýdyń ózegi sanalatyn memlekettik qyzmetshiniń salaýatty ómir saltyn ustanýy qashanda mańyzdy. Memlekettik qyzmetshi barlyq jaǵynan qoǵamǵa úlgi bolýy tiis. Memlekettik qyzmetti jaýapkershilikpen atqaryp júrgen sizderge sportta da jarqyn jeńister tileimin. Memlekettik qyzmetkerler arasyndaǵy onynshy jazǵy Spartakiadany ashyq dep jariialaimyn! – dedi A. Batalov. Sonymen qatar Memlekettik qyzmet isteri jáne sybailas jemqorlyqqa qarsy is-qimyl agenttiginiń Almaty oblysy boiynsha departamentiniń basshysy, Ádep jónindegi keńestiń tóraǵasy Serikbai Nurǵisaev ta jarysqa qatysýshylarǵa jeńis tiledi.
Spartakiadaǵa óńirdiń 16 aýdany men 3 qalasynyń memlekettik qyzmetshileri, oblys ákimdigi, sonymen qatar quqyq qorǵaý organdarynyń komandalary qatysýda. Jarystar sporttyń toǵyzqumalaq, biliard, voleibol, shaǵyn fýtbol, basketbol, ústel tennisi, shahmat túrleri boiynsha «Jastar» Sport saraiynda, «Órken», «Dinamo», «Jastar – 2» sport keshenderinde ótedi. Spartakiada eki kúnge sozylyp, qorytyndysy erteń keshkilik belgili bolady.
Aita ketsek, jalpy Almaty oblysynda búginde 8500-ge jýyq memlekettik qyzmetshi jumys isteidi, olardyń 2 myńnan astamy 28 jasqa deiingi jastar, iaǵni olar 23% qurap otyr. Memlekettik qyzmetshilerdiń ortasha jasy – 39.
