Premer-ministr Oljas Bektenovtiń tóraǵalyǵymen ótken Úkimet otyrysynda kóleńkeli ekonomikany tómendetý boiynsha qabyldanyp jatqan sharalar qaraldy. Osy baǵytta júrgizilip jatqan jumystar týraly qarjy ministri Mádi Takiev pen qarjylyq monitoring agenttigi tóraǵasynyń orynbasary Qairat Bijanov baiandady, dep habarlaidy Dalanews.kz Úkimettiń baspasóz qyzmetine silteme jasap.
"Memleket basshysy biyl Jalpy ishki ónimdegi kóleńkeli ekonomika úlesin 15%-ǵa deiin azaitý mindetin qoidy. Bul kórsetkishti odan ári tómendete berýge tiispiz. Bizge taza ári ashyq ekonomika kerek. Osy baǵytta barlyq memlekettik organdar men biznes sýbektileriniń jumysyn kúsheitý qajet. Bul jumys tek hat-habar almasyp, esep berýmen ǵana shektelmeýge tiis. Ekonomika jáne salyq turaqtylyǵy, tsifrlandyrý, sondai-aq biznes júrgizýdi ońailatý isinde sapaly ári keshendi sheshimder qajet", — dep atap ótti Oljas Bektenov.
Memleket basshysy Qazaqstan halqyna Joldaýynda jappai tsifrlandyrý jáne jasandy intellekt tehnologiiasyn engizý arqyly ekonomikanyń barlyq salasyn jańǵyrtý qajettigin atap ótti. Bul – strategiialyq mindet.
Sonymen qatar birqatar sektorda, onyń ishinde saýda, qurylys jáne aýyl sharýashylyǵy salalarynda tsifrlandyrý deńgeii áli de jetkiliksiz deńgeide. Barlyq múddeli ministrlikterge óz salasynda jappai tsifrlandyrýdy qamtamasyz etý tapsyryldy.
"Ekonomikany tsifrlyq jańǵyrtý sheńberinde memlekettik kirister komiteti memlekettik organdar arasynda kósh bastaýǵa tiis. Tek júieli qadamdar ǵana memleket pen biznes arasyndaǵy qarym-qatynastyń jańa servistik modelin qurýǵa múmkindik beredi. Tsifrlyq bastamalardy júzege asyrý úshin tiisti resýrstar qajet. Osyǵan bailanysty jasandy intellekt jáne tsifrlyq damý ministrligi kelesi jyly Memlekettik kirister komitetiniń óz aldyna Derekterdi óńdeý ortalyǵyn qurýy kerek", dep atap ótti Oljas Bektenov.
Qazaqstandaǵy birqatar tsifrlyq joba óz tiimdiligin kórsetti. Kóleńkeli ekonomikamen kúreste qolma-qol aqshasyz tólemder mańyzdy ról atqarady.
Keibir óńirlerde avtomobil joldary jáne temirjol qurylysy, iri qara mal men aýyl sharýashylyǵy tehnikasyn satyp alýdy sýbsidiialaý, sondai-aq qosylǵan qun salyǵyn qaitarý kezinde tsifrlyq teńgeni qoldaný boiynsha pilottyq jobalar júzege asyrylýda.
"Jobany odan ári taratý úshin Qarjy ministrligi Ulttyq Bankpen birlesip, respýblikalyq jáne jergilikti biýdjetter, sondai-aq memlekettik holdingterdiń biýdjetteri sheńberinde tsifrlyq teńgeni paidalanýdy qamtamasyz etýi qajet. Jumystyń nátijesi týraly maǵan keler jyldyń 1 aqpanyna deiin baiandańyzdar. Qaryzdar men sýbsidiialardyń maqsatty túrde jumsalýyna avtomattandyrylǵan monitoring júiesin engizý úshin aqparattyq júielerdiń integratsiiasyn qamtamasyz etip, baqylaýdy kúsheitý qajet", — dep tapsyrdy Oljas Bektenov.
Kedendik ákimshilendirýdiń jan-jaqty ári ashyq bolýy respýblikalyq biýdjet kiristeriniń kólemine aitarlyqtai áser etedi. Sondyqtan Qarjy jáne Saýda ministrlikteri eksporttyq jáne importtyq operatsiialarǵa monitoring jasaýdy kúsheitýi qajet. Táýekelder beiinin jańartyp, júk tasymaldaryn "jasyl dáliz" qaǵidaty boiynsha tranzitteý úshin jaǵdai jasaý adami faktordyń aldyn alýy tiis.
Sonymen qatar júkterdi tekserý derekterin taldaý kezinde jasandy intellektini engizý qajet. Bul sybailas jemqorlyqtyń jolyn kesýge ári shekaradan ótý protsesterin jedeldetýge múmkindik beredi. Qarjy ministrligine Qarjylyq monitoring agenttigimen birlesip, kóleńkeli ekonomikaǵa qarsy is-qimyldy úilestirý jumysyn kúsheitý tapsyryldy.
Kóleńkeli ekonomikany tómendetý jónindegi sharalardy qaraý qorytyndysy boiynsha Premer-ministr jaýapty vedomstvolarǵa birqatar tapsyrma berdi:
-
Ulttyq ekonomika jáne Qarjy ministrlikteri naqty usynystardy engize otyryp, kóleńkeli ekonomikaǵa qarsy is-qimyl jónindegi sharalardyń tiimdiligi týraly jyl saiynǵy keńeitilgen taldamalyq baiandamany ázirleýdi qamtamasyz etsin.
-
Zańdy tulǵalardy tirkeý men qaita tirkeýdi qadaǵalap otyrý úshin Ádilet, Qarjy, Jasandy intellekt ministrlikterine Qarjylyq monitoring agenttigimen birlesip, osy jyldyń 25 qarashasyna deiin táýekelderdi basqarýdyń avtomattandyrylǵan júiesin engizý jumystaryn aiaqtaý tapsyryldy.
-
Taldaý dáldigi men ákimshilendirý sapasyn arttyrý úshin memlekettik organdar men qarjy uiymdary arasyndaǵy aqparattyq ózara is-qimyldy kúsheitý qajet. Osyǵan bailanysty Qarjy, Jasandy intellekt ministrlikteri jáne basqa da memlekettik organdar derekterdi Smart Data Finance júiesimen integratsiialaýdy qamtamasyz etsin.
Úilestirý men baqylaý jumystary Premer-ministrdiń orynbasary – ulttyq ekonomika ministri Serik Jumanǵaringe tapsyryldy.
