پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا كولەڭكەلى ەكونوميكانى تومەندەتۋ بويىنشا قابىلدانىپ جاتقان شارالار قارالدى. وسى باعىتتا جۇرگىزىلىپ جاتقان جۇمىستار تۋرالى قارجى ءمينيسترى ءمادي تاكييەۆ پەن قارجىلىق مونيتورينگ اگەنتتىگى ءتوراعاسىنىڭ ورىنباسارى قايرات بيجانوۆ باياندادى، دەپ حابارلايدى Dalanews.kz ۇكىمەتتىڭ باسپا ءسوز قىزمەتىنە سىلتەمە جاساپ.

"مەملەكەت باسشىسى بيىل جالپى ىشكى ونىمدەگى كولەڭكەلى ەكونوميكا ۇلەسىن 15%-عا دەيىن ازايتۋ مىندەتىن قويدى. بۇل كورسەتكىشتى ودان ءارى تومەندەتە بەرۋگە ءتيىسپىز. بىزگە تازا ءارى اشىق ەكونوميكا كەرەك. وسى باعىتتا بارلىق مەملەكەتتىك ورگاندار مەن بيزنەس سۋبەكتىلەرىنىڭ جۇمىسىن كۇشەيتۋ قاجەت. بۇل جۇمىس تەك حات-حابار الماسىپ، ەسەپ بەرۋمەن عانا شەكتەلمەۋگە ءتيىس. ەكونوميكا جانە سالىق تۇراقتىلىعى، سيفرلاندىرۋ، سونداي-اق بيزنەس جۇرگىزۋدى وڭايلاتۋ ىسىندە ساپالى ءارى كەشەندى شەشىمدەر قاجەت"، — دەپ اتاپ ءوتتى ولجاس بەكتەنوۆ.

مەملەكەت باسشىسى قازاقستان حالقىنا جولداۋىندا جاپپاي سيفرلاندىرۋ جانە جاساندى ينتەللەكت تەحنولوگياسىن ەنگىزۋ ارقىلى ەكونوميكانىڭ بارلىق سالاسىن جاڭعىرتۋ قاجەتتىگىن اتاپ ءوتتى. بۇل – ستراتەگيالىق مىندەت.

سونىمەن قاتار ءبىرقاتار سەكتوردا، ونىڭ ىشىندە ساۋدا، قۇرىلىس جانە اۋىل شارۋاشىلىعى سالالارىندا سيفرلاندىرۋ دەڭگەيى ءالى دە جەتكىلىكسىز دەڭگەيدە. بارلىق مۇددەلى مينيسترلىكتەرگە ءوز سالاسىندا جاپپاي سيفرلاندىرۋدى قامتاماسىز ەتۋ تاپسىرىلدى. 

"ەكونوميكانى سيفرلىق جاڭعىرتۋ شەڭبەرىندە مەملەكەتتىك كىرىستەر كوميتەتى مەملەكەتتىك ورگاندار اراسىندا كوش باستاۋعا ءتيىس. تەك جۇيەلى قادامدار عانا مەملەكەت پەن بيزنەس اراسىنداعى قارىم-قاتىناستىڭ جاڭا سەرۆيستىك مودەلىن قۇرۋعا مۇمكىندىك بەرەدى. سيفرلىق باستامالاردى جۇزەگە اسىرۋ ءۇشىن ءتيىستى رەسۋرستار قاجەت. وسىعان بايلانىستى جاساندى ينتەللەكت جانە سيفرلىق دامۋ مينيسترلىگى كەلەسى جىلى مەملەكەتتىك كىرىستەر كوميتەتىنىڭ ءوز الدىنا دەرەكتەردى وڭدەۋ ورتالىعىن قۇرۋى كەرەك"، دەپ اتاپ ءوتتى ولجاس بەكتەنوۆ.

قازاقستانداعى ءبىرقاتار سيفرلىق جوبا ءوز تيىمدىلىگىن كورسەتتى. كولەڭكەلى ەكونوميكامەن كۇرەستە قولما-قول اقشاسىز تولەمدەر ماڭىزدى ءرول اتقارادى.

كەيبىر وڭىرلەردە اۆتوموبيل جولدارى جانە تەمىرجول قۇرىلىسى، ءىرى قارا مال مەن اۋىل شارۋاشىلىعى تەحنيكاسىن ساتىپ الۋدى سۋبسيديالاۋ، سونداي-اق قوسىلعان قۇن سالىعىن قايتارۋ كەزىندە سيفرلىق تەڭگەنى قولدانۋ بويىنشا پيلوتتىق جوبالار جۇزەگە اسىرىلۋدا. 

"جوبانى ودان ءارى تاراتۋ ءۇشىن قارجى مينيسترلىگى ۇلتتىق بانكپەن بىرلەسىپ، رەسپۋبليكالىق جانە جەرگىلىكتى بيۋدجەتتەر، سونداي-اق مەملەكەتتىك حولدينگتەردىڭ بيۋدجەتتەرى شەڭبەرىندە سيفرلىق تەڭگەنى پايدالانۋدى قامتاماسىز ەتۋى قاجەت. جۇمىستىڭ ناتيجەسى تۋرالى ماعان كەلەر جىلدىڭ 1 اقپانىنا دەيىن بايانداڭىزدار. قارىزدار مەن سۋبسيديالاردىڭ ماقساتتى تۇردە جۇمسالۋىنا اۆتوماتتاندىرىلعان مونيتورينگ جۇيەسىن ەنگىزۋ ءۇشىن اقپاراتتىق جۇيەلەردىڭ ينتەگراسياسىن قامتاماسىز ەتىپ، باقىلاۋدى كۇشەيتۋ قاجەت"، — دەپ تاپسىردى ولجاس بەكتەنوۆ. 

كەدەندىك اكىمشىلەندىرۋدىڭ جان-جاقتى ءارى اشىق بولۋى رەسپۋبليكالىق بيۋدجەت كىرىستەرىنىڭ كولەمىنە ايتارلىقتاي اسەر ەتەدى. سوندىقتان قارجى جانە ساۋدا مينيسترلىكتەرى ەكسپورتتىق جانە يمپورتتىق وپەراسيالارعا مونيتورينگ جاساۋدى كۇشەيتۋى قاجەت. تاۋەكەلدەر بەيىنىن جاڭارتىپ، جۇك تاسىمالدارىن "جاسىل ءدالىز" قاعيداتى بويىنشا ترانزيتتەۋ ءۇشىن جاعداي جاساۋ ادامي فاكتوردىڭ الدىن الۋى ءتيىس.

سونىمەن قاتار جۇكتەردى تەكسەرۋ دەرەكتەرىن تالداۋ كەزىندە جاساندى ينتەللەكتىنى ەنگىزۋ قاجەت. بۇل سىبايلاس جەمقورلىقتىڭ جولىن كەسۋگە ءارى شەكارادان ءوتۋ پروسەستەرىن جەدەلدەتۋگە مۇمكىندىك بەرەدى. قارجى مينيسترلىگىنە قارجىلىق مونيتورينگ اگەنتتىگىمەن بىرلەسىپ، كولەڭكەلى ەكونوميكاعا قارسى ءىس-قيمىلدى ۇيلەستىرۋ جۇمىسىن كۇشەيتۋ تاپسىرىلدى.

كولەڭكەلى ەكونوميكانى تومەندەتۋ جونىندەگى شارالاردى قاراۋ قورىتىندىسى بويىنشا پرەمەر-مينيستر جاۋاپتى ۆەدومستۆولارعا ءبىرقاتار تاپسىرما بەردى:

• ۇلتتىق ەكونوميكا جانە قارجى مينيسترلىكتەرى ناقتى ۇسىنىستاردى ەنگىزە وتىرىپ، كولەڭكەلى ەكونوميكاعا قارسى ءىس-قيمىل جونىندەگى شارالاردىڭ تيىمدىلىگى تۋرالى جىل سايىنعى كەڭەيتىلگەن تالدامالىق باياندامانى ازىرلەۋدى قامتاماسىز ەتسىن. 

• زاڭدى تۇلعالاردى تىركەۋ مەن قايتا تىركەۋدى قاداعالاپ وتىرۋ ءۇشىن ادىلەت، قارجى، جاساندى ينتەللەكت مينيسترلىكتەرىنە قارجىلىق مونيتورينگ اگەنتتىگىمەن بىرلەسىپ، وسى جىلدىڭ 25 قاراشاسىنا دەيىن تاۋەكەلدەردى باسقارۋدىڭ اۆتوماتتاندىرىلعان جۇيەسىن ەنگىزۋ جۇمىستارىن اياقتاۋ تاپسىرىلدى.

• تالداۋ دالدىگى مەن اكىمشىلەندىرۋ ساپاسىن ارتتىرۋ ءۇشىن مەملەكەتتىك ورگاندار مەن قارجى ۇيىمدارى اراسىنداعى اقپاراتتىق ءوزارا ءىس-قيمىلدى كۇشەيتۋ قاجەت. وسىعان بايلانىستى قارجى، جاساندى ينتەللەكت مينيسترلىكتەرى جانە باسقا دا مەملەكەتتىك ورگاندار دەرەكتەردى Smart Data Finance جۇيەسىمەن ينتەگراسيالاۋدى قامتاماسىز ەتسىن. 

ۇيلەستىرۋ مەن باقىلاۋ جۇمىستارى پرەمەر-مينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارينگە تاپسىرىلدى.