Qazaqstan Respýblikasynyń Memlekettik keńesshisi Erlan Qarin "Birlik pen damý: Memleket basshysy Qasym-Jomart Toqaevtyń saiasi baǵdarynyń basty negizderi" atty maqalasynda bilik pen qoǵam arasynda turaqty túrde dialog júrgizilýi qanshalyq mańyzdy ekenine toqtaldy, - dep habarlaidy Dalanews.kz.
Memlekettik keńesshi "el birligin, tatýlyq pen beibitshilikti, etnosaralyq jáne dinaralyq kelisimdi saqtaý arqyly turaqtylyqty qamtamasyz etý memlekettiń ishki saiasatyndaǵy negizgi basymdyq bolyp qala beretinin" málimdedi.
"Osy saladaǵy jumys halyqty ortaq maqsatqa uiystyrý jáne ishki saiasi turaqtylyqty qamtamasyz etý úshin únemi tyń ádis-tásilder, tetikter men formalar oilastyrýdy talap etedi.
"Ishki saiasat – saiasi tehnologiialardyń jiyntyǵy ári jalań úgit-nasihat" degen túsinik el ishinde keń taralǵan. Bul – shyndyqqa esh janaspaityn jańsaq pikir. Munyń bári – saiasattyń qosalqy quraly ǵana. Eshqandai saiasi tehnologiia halyqqa etene jaqyndyq pen el-jurtpen qoian-qoltyq jumystyń ornyn toltyra almaidy. Ishki saiasat degenimiz – eń aldymen, halyqpen tikelei jumys isteý degen sóz, iaǵni adamdarmen ashyq áńgimelesip, turaqty dialog ornatý qajet. Sonymen birge, ysqyryǵy jer jaratyn bázbireýlerdi kópshiliktiń sózin sóilep júrgen adam dep túsiný ábestik. Mundai qatelikke urynýǵa jol joq. Sondyqtan dialogtiń syndarly, mazmundy ári maǵynaly bolǵany jón.
Endeshe, qazirgi tańda memlekettik apparat úshin barlyq áleýmettik toptarmen jáne azamattyq qoǵam ókilderimen tikelei qarym-qatynasta bolý – eń mańyzdy máseleniń biri", - dedi Erlan Qarin.
