Sózimizge dálel, biylǵy jyldyń sońyna deiin atalǵan baǵyt boiynsha Almatyda bes mektep paidalanýǵa berilmekshi. Osy ýaqytqa deiin, aitalyq 2021-2022 oqý jyldarynda shaharda sý jańa 3 memlekettik mektep jáne burynnan bilim berip otyrǵan 17 bilim oshaǵynyń janynan qosymsha ǵimarattar salynyp, oqýshylardyń bilim alýyna jaqsy múmkindikter qarastyrylǵan bolatyn.
Qalalyq bilim basqarmasynyń bizge bergen derekterine súiensek, biyl jyl sońyna deiin bes mektep jáne 5 qosalqy ǵimarat qoldanylýǵa berilmekshi. Osy nysandar paidalanýǵa berilse, memlekettik mektepterde 23,6 myń oqýshy jaily bilim ordasynda emin erkin bilim alýǵa múmkindik alady. Sóitip, buǵan deiin saqtalyp kelgen mektepterdegi oryn tapshylyq problemasy 72 paiyzǵa qysqarady dep kútilýde. Jospardaǵydai bolsa, mektep túitkili sheshiler edi degen úmit basym.
Sonymen, Almatynyń qai aýdandarynda mektepke qajettilik basym? Qai aýdandarynda qandai bilim oshaqtary salynyp jatyr? Osy máseleler kún tártinbinde turǵany anyq.
Jospar boiynsha, mektep táýeldiligi bar 12,6 myń oqýshyǵa arnalǵan sý jańa 8 mektep salynbaqshy.
Onyń beseýi, árine mektep qajettiligi basym Alataý aýdanyna josparlanyp otyr. Aitalyq, Saialy, Tomiris, Darhan, Mádeniet, Nurkent shaǵyn aýdandarynda turǵyndar sany kóp, mektep jasyndaǵy balalar da barshylyq. Bul aýdandar buǵan deiin mektep tapshylyǵyn basynan keship otyrǵan.
Al odan keiin eki mektep Naýryzbai aýdanyna salynady dep josparlanyp otyr. Qalǵan bir bilim oshaǵy Túrksib aýdanyna salý josparlanyp qoiypty. Qairat yqsham aýdanynda buǵan deiin birde bir mektep bolmaǵan. Sonyń orny endi tolatyn kórinedi. «Qairattyń» balalary endi óz aýdandaryndaǵy mektepke barady.
Biz atap aityp otyrǵan Qalqaman, Saialy men Tomiris shaǵyn aýdandaryndaǵy mektepterdiń qurylysy aiaqtalǵan. Merdiger kompaniia biyl jyl sońyna qarai paidalanýǵa bermekshi. Memlekettik jáne jeke menshik áriptestik negizinde salynǵan mektepterdiń negizgilerin «KAZPACO» JShS men BI Group-tyń enshiles kompaniiasy salýda.
Memleket pen jeke menshik seriktik degen osy. Memleket aqsha bóledi, al jeke menshik kompaniialar kelisimshart aiasynda mektep salady.
Atalǵan kompaniia 8 mektepti salýǵa memlekettik tenderdi utyp alǵanyn aita keteiik. Osy segiz bilim oshaǵynyń qurylys jumystary úshin kompaniia memleketten 42,6 mlrd teńge alǵan. 12,6 myń oqýshyǵa bólsek, árbir oqýshyǵa ortasha eseppen 3,4 mln teńgeden ainalady. Bul memleketten ár balaǵa bólingen qarajat. Atalǵan segiz mekteptiń ishindegi eń qymbat bilim oshaǵy – Qalqaman-2 yqsham aýdanyndaǵy salynyp jatqany. Bul 1500 oryndyq mektep qurylysyna memleket qazynasynan 6 mlrd teńge bólingenin aita keteiik. Árbir oqýshyǵa bólip ortasha esepbin aitar bolsaq, 4 mln teńgeden ainalady eken.
Endi mektep janynan salynyp jatqan qosalqy qurylystarǵa toqtalaiyq. Dál qazir bilim berip turǵan 22 mektepti keńeitý jumystary júrip jatyr. Sol arqyly 11 000 oqýshy oryny ashylǵan bolatyn. Mundai qosalǵy nysandar Bostandyq aýdanyndaǵy birneshe mektepke salyndy. №38, 60, 199 mektepter. Jyldyń aiaǵyna deiin №9, 191, 125, 146 mektepterde osyndai qosymsha ǵimarattar salynyp, paidalanýǵa beriletin bolady.
Almaty mektepteriniń ishinde Áýezov aýdanyndaǵy № 6, 117, 121, 132, 133 mektepterdegi qosalqy qurylys nysandary da paidalanýǵa berilýde.
Odan bólek, Jetisý aýdanynda tórt mektep bar: № 43, 57, 102, 177 mektepterge qosalqy nysandar salyndy. Almaly aýdanyndaǵy №34 pen 144 ke, Alataýdaǵy №166 bilim oshaǵyna, Túrksibtegi №170 bilim nysanyna, Naýryzbaidaǵy 186 mektepke osyndai qosalqy ǵimarattar salynyp, oqýshylardyń igiligine berildi dep josparlanyp otyr. Al Medeý aýdanynda ornalasqan №48 mekteptiń qosymsha ǵimaraty biyl jyldyń sońyna qarai aiaqtalady dep josparlanýda.
Memlekettik jeke menshik seriktestik aiasynda qosalqy qurylys salýmen ainalysatyn jeńimpaz kompaniianyń biri – SHEBERBUILD JShS. Seriktestik aiasynda № 121, 133, 144, 170, 199, 191 bilim shańyraqtaryna qosymsha ǵimarattar salyndy.
Jyl aqyryna deiin aiaqtalatyndary da bar. №38 gimnaziianyń qosalqy oqý kabinetterin jabdyqtaýǵa «Elektrokabel zaýyty» jaýapty. Al «Baýyr Qurylys kompaniiasy» №43 mektepti keńeitýge jáne gimnaziianyń fýtbol alańynda qosymsha oqý ǵimaratyn soǵyp berdi. Al №60 mekteptiń qosalqy oqý korpýsyn «Jóndeý-Qurylys» JShS aiaqtady.
Almaty qalalyq bilim basqarmasynyń bizge bergen derekterine súiensek, shaharda bir jyl ishinde memlekettik mektepter ǵana emes, 2,7 myń balaǵa arnalǵan 13 jańa jekemenshik bilim oshaǵy ashylypty. Jospar boiynsha 2022 jyldyń aiaǵyna deiin taǵy osyndai 3,3 myń oqýshyǵa arnalǵan alty bilim shańyraǵy qosylady.
