Memlekettik telearnalarda jańa maýsymda túrik serialdary ádettegiden az kórsetiledi. Bul týraly aqparat jáne qoǵamdyq damý ministri Aida Balaeva aitty dep habarlaidy Dalanews.kz sputniknews-ke siltep.
Qazaqstan prezidentiniń teleradiokesheni ministr Aida Balaevanyń suhbatyn jariialady. Ol jerde ministr jańa maýsymda telearnalarda qandai ózgeris bolatynyn aitty. Balaeva ministr laýazymyna taǵaiyndalǵannan keiin memlekettik telearnalardyń jumysyna qatysty kóptegen usynys pen syn-pikir aitylǵanyn málimdedi.
"Azamattardan arnalarda oiyn-saýyq pen serialdardyń kóp kórsetiletini jaily kóptegen shaǵym tústi. Osyǵan bailanysty jańa maýsymnan bastap sheteldik oiyn-saýyq mazmundy baǵdarlamalar men serialdardy satyp alýdy 30%-ke qysqartamyz degen sheshim qabyldandy. Alaida túrik serialdaryn túgeldei alyp tastaýǵa bolmaidy. Bir aýditoriianyń qamyn oilap, ekinshi aýditoriiany eleýsiz qaldyra almaimyz. Bir aýditoriia ony qalap, kútip otyrady. Apalarymyz ár serial keiipkeriniń tileýin tilep otyrady. Solarmen birge qýanyp, birge muńaiady. Ol aýditoriianyń múddesin taptai almaimyz", - dedi Balaeva.
Ministrdiń aitýynsha, endi telearnadan otandyq ónim kóbirek kórsetiletin bolady. Eldiń áleýmettik-ekonomikalyq ómirin, memlekettik organdardyń qyzmetin, sonymen qatar memlekettik baǵdarlamalar men bastamalardyń iske asyrylýy kórsetiletin baǵdarlamalar kóbeiedi dep kútilýde.
"Pandemiia ekonomikalyq jaǵdaiǵa áser etti, sondyqtan biz "ál-Farabi" telearnasyn iske qosýdan bas tartý týraly sheshim qabyldadyq. Buǵan deiin eki jańa arnanyń iske qosylatyny habarlandy. Bul bastama jaǵdai ońalǵan ýaqytqa shegerilip otyr. Qazir qoldanystaǵy arnalardyń mazmunyn jaqsartý týraly sheshim qabyldandy. "Elarna" mádeni-bilim arnasy retinde jumys isteidi. Sondai-aq, Kazakh TV arnasyna rebrending jasalady", - dedi Balaeva.
Otandyq serialdar men derekti filmderdi ekranǵa shyǵarý maqsatynda "Qazaqfilmniń" negizgi seriktesi bolý da ministrliktiń josparynda bar.
Sonymen qatar Balaeva ministrlikte memlekettik tapsyrys júiesine taldaý júrgizilgenin aitty.
"Qazir memlekettik baǵdarlamalardy keńirek jariia etýge, taldaý materialdaryn kóbirek jasaýǵa baǵyttalǵan naqty pikirler bar. Bul memleket saiasatyn keńinen tanystyrýǵa múmkindik beredi. Belgili bir baǵdarlamalarǵa nemese bastamalarǵa qatysty saraptamalyq pikir árqashan mańyzdy. Kelesi jyldan bastap jańa formatta jumys isteimiz", - dedi Balaeva.
