جاڭا ماۋسىمدا مەملەكەتتىك تەلەارنالاردا سەريالدار مەن ويىن-ساۋىق مازمۇنىنداعى باعدارلامالار ازاياتىن بولادى، ولاردىڭ ورنىنا قازاقستاندىقتارعا مەملەكەتتىك باعدارلامالاردىڭ جۇزەگە اسىرىلۋى كورسەتىلمەك. 

مەملەكەتتىك تەلەارنالاردا  جاڭا ماۋسىمدا تۇرىك سەريالدارى ادەتتەگىدەن از كورسەتىلەدى. بۇل تۋرالى اقپارات جانە قوعامدىق دامۋ ءمينيسترى ايدا بالايەۆا ايتتى دەپ حابارلايدى Dalanews.kz sputniknews-كە سىلتەپ.

قازاقستان پرەزيدەنتىنىڭ تەلەراديوكەشەنى مينيستر ايدا بالايەۆانىڭ سۇحباتىن جاريالادى. ول جەردە مينيستر جاڭا ماۋسىمدا تەلەارنالاردا قانداي وزگەرىس بولاتىنىن ايتتى. بالايەۆا مينيستر لاۋازىمىنا تاعايىندالعاننان كەيىن مەملەكەتتىك تەلەارنالاردىڭ جۇمىسىنا قاتىستى كوپتەگەن ۇسىنىس پەن سىن-پىكىر ايتىلعانىن مالىمدەدى.

"ازاماتتاردان ارنالاردا ويىن-ساۋىق پەن سەريالداردىڭ كوپ كورسەتىلەتىنى جايلى كوپتەگەن شاعىم ءتۇستى. وسىعان بايلانىستى جاڭا ماۋسىمنان باستاپ شەتەلدىك ويىن-ساۋىق مازمۇندى باعدارلامالار مەن سەريالداردى ساتىپ الۋدى 30%-كە قىسقارتامىز دەگەن شەشىم قابىلداندى. الايدا تۇرىك سەريالدارىن تۇگەلدەي الىپ تاستاۋعا بولمايدى. ءبىر اۋديتوريانىڭ قامىن ويلاپ، ەكىنشى اۋديتوريانى ەلەۋسىز قالدىرا المايمىز.  ءبىر اۋديتوريا ونى قالاپ، كۇتىپ وتىرادى. اپالارىمىز ءار سەريال كەيىپكەرىنىڭ تىلەۋىن تىلەپ وتىرادى. سولارمەن بىرگە قۋانىپ، بىرگە مۇڭايادى. ول اۋديتوريانىڭ مۇددەسىن تاپتاي المايمىز"، - دەدى بالايەۆا.

ءمينيستردىڭ ايتۋىنشا، ەندى تەلەارنادان وتاندىق ءونىم كوبىرەك كورسەتىلەتىن بولادى. ەلدىڭ الەۋمەتتىك-ەكونوميكالىق ءومىرىن، مەملەكەتتىك ورگانداردىڭ قىزمەتىن، سونىمەن قاتار مەملەكەتتىك باعدارلامالار مەن باستامالاردىڭ ىسكە اسىرىلۋى كورسەتىلەتىن باعدارلامالار كوبەيەدى دەپ كۇتىلۋدە.

"پاندەميا ەكونوميكالىق جاعدايعا اسەر ەتتى، سوندىقتان ءبىز "ءال-فارابي" تەلەارناسىن ىسكە قوسۋدان باس تارتۋ تۋرالى شەشىم قابىلدادىق. بۇعان دەيىن ەكى جاڭا ارنانىڭ ىسكە قوسىلاتىنى حابارلاندى. بۇل باستاما جاعداي وڭالعان ۋاقىتقا شەگەرىلىپ وتىر. ءقازىر قولدانىستاعى ارنالاردىڭ مازمۇنىن جاقسارتۋ تۋرالى شەشىم قابىلداندى. "ەلارنا" مادەني-بىلىم ارناسى رەتىندە جۇمىس ىستەيدى. سونداي-اق، Kazakh TV ارناسىنا رەبرەندينگ جاسالادى"، - دەدى بالايەۆا.

وتاندىق سەريالدار مەن دەرەكتى فيلمدەردى ەكرانعا شىعارۋ ماقساتىندا "ءقازاقفيلمنىڭ" نەگىزگى سەرىكتەسى بولۋ دا مينيسترلىكتىڭ جوسپارىندا بار.

سونىمەن قاتار بالايەۆا مينيسترلىكتە مەملەكەتتىك تاپسىرىس جۇيەسىنە تالداۋ جۇرگىزىلگەنىن ايتتى.

"ءقازىر مەملەكەتتىك باعدارلامالاردى كەڭىرەك جاريا ەتۋگە، تالداۋ ماتەريالدارىن كوبىرەك جاساۋعا باعىتتالعان ناقتى پىكىرلەر بار. بۇل مەملەكەت ساياساتىن كەڭىنەن تانىستىرۋعا مۇمكىندىك بەرەدى. بەلگىلى ءبىر باعدارلامالارعا نەمەسە باستامالارعا قاتىستى ساراپتامالىق پىكىر ءارقاشان ماڭىزدى. كەلەسى جىلدان باستاپ جاڭا فورماتتا جۇمىس ىستەيمىز"، - دەدى بالايەۆا.