Shymkent qalasynyń qylmystyq ister jónindegi aýdanaralyq soty Dene shynyqtyrý jáne sport basqarmasy emhanasynyń bas býhgalterine qatysty qylmystyq isti qarady, - dep habarlaidy Dalanews.kz.
Tergeý organy býhgalterdi qyzmet babyn paidalana otyryp, senip tapsyrylǵan asa iri mólsherdegi múlikti ielendi dep aiyptady (Qylmystyq kodekstiń 189-babynyń 4-bóliginiń 2-tarmaǵy boiynsha).
Sot emhananyń bas býhgalteri bir jyl boiy qyzmetkerlerdiń shotyna jalaqysynan asyp túsetin qarajatty eseptep otyrǵanyn anyqtady. Sodan keiin ol osy artyq jinaqtalǵan qarajatty dosynyń bank kartasyna qaitarýdy suraǵan. Osylaisha, bul aqshany ózi iemdenip, óz qajetine jaratqan.
Sottalýshynyń áreketinen memleketke 29 million teńgeden asa shyǵyn kelgen.
Prokýror aiyptalýshyǵa 7,5 jylǵa bas bostandyǵynan aiyrý jazasyn taǵaiyndaýdy surady. Sottalýshy óz kinásin ishinara moiyndap, sottan bas bostandyǵynan aiyrý emes, basqa jaza taǵaiyndaýdy surady.
Sot sottalýshynyń shyn júrekten ókinýin jeńildetetin mán-jai dep tanydy.
Sottalýshy Qylmystyq kodekstiń 189-babynyń 4-bóliginiń 2) tarmaǵy boiynsha kináli dep tanyldy. Oǵan memlekettik qyzmette laýazymdardy atqarý quqyǵynan ómir boiyna aiyra otyryp, 7,5 jylǵa bas bostandyǵynan aiyrý jazasy taǵaiyndaldy.
Úkim zańdy kúshine engen joq.
