Qazaqstanda bólim boiynsha jiyntyq baǵalaý (BJB) men toqsandyq jiyntyq baǵalaýdan (TJB) kezeń-kezeńimen bas tartý josparlanyp otyr. Bul týraly 8 qyrkúiekte Úkimet otyrysynan keiin ótken brifingte Oqý-aǵartý ministri Juldyz Súleimenova málimdedi, dep habarlaidy dalanews.kz.
Oqý-aǵartý ministrligi jiyntyq baǵalaý júiesin orta jáne joǵary synyptarda da ózgertýdi josparlap otyr. Aldaǵy ýaqytta jańashyldyq aldymen 5–9-synyptardy qamtidy. Ony 2027–2028 oqý jylynan bastap birtindep engizý kózdelgen.
Juldyz Súleimenovanyń sózinshe, BJB men TJB-dan bas tartpas buryn jańa baǵalaý tártibi ázirlenip, mektepter men pedagogter ádistemelik turǵydan daiyndalýy kerek.
"Kelesi kezekte 5–9-synyptardaǵy baǵalaý júiesine ózgeris engiziledi. Qajetti ádistemelik daiyndyq aiaqtalǵan soń, kelesi oqý jylynan bastap BJB men TJB-ny birtindep alyp tastaimyz. Sodan keiin 10–11-synyptardaǵy baǵalaý tásilderin qarastyramyz", – dedi ministr.
Al biylǵy oqý jylynan bastap bastaýysh synyptarda BJB men TJB-nyń burynǵy úlgisi qoldanylmaidy. Endi muǵalimder oqýshylardyń bilimin diktant, mazmundama, shyǵarma, baqylaý jumysy, joba jáne praktikalyq tapsyrmalar arqyly baǵalaidy.
