Áıtse de, áli kúnge deıin sabaqqa balasynyń betin búrkemelep jiberetinder azaıar emes. Olar mektep formasyn talap etken muǵalimderdiń ózderin sotpen qorqytady. Al bılik ókilderi kerisinshe zańǵa moıynsunbaǵandardy qatań jazalaýǵa negiz bar ekenin aıtady.
Jańa oqý jyly bastalǵaly beri oqýshy qyzdardyń mektepke oramal taǵyp kelýine qatysty daý bir basylar emes. Muǵalimder bilim mınıstrliginiń buıryǵyn alǵa tartyp, dindar ata-analarǵa talap qoıǵanymen, kóbi áli kúnge deıin qarsylyq tanytyp keledi.
Bir Aqtóbeniń ózinde úsh júzge jýyq oqýshy mektepte betin búrkemelep júredi. Alǵashqyda ata-analar ony ulttyq kıim-kımeshekke teńep aldaýsyratqan edi. Keıin tipti keıbireýleri balamyzdyń quqyǵy buzyldy dep mektep basshylaryn sotqa súıregen. Biraq buıryqtyń da zańdyq kúshi baryn bilgende ǵana raılarynan qaıtypty.
Elmıra Nıetalına, №19 mektep dırektorynyń orynbasary:
– Ata-analardy shaqyryp alyp, qanshama ret eskerttik. Mektepte oramal taǵýǵa bolmaıtynyn aıtyp túsindirdik. Biraq qarsy boldy. Aqyry mektep basshylyǵy men bilim bólimin sotqa berdi. Sot otyrysy bolatyn kúni aryzdaryn qaıtaryp aldy.
Bir aı buryn Jańaózendegi oqýshylardyń ákeleri narazylyqqa shyqqan edi. Áıtse de, ondaǵy jaǵdaı túzelip, oqýshylar jappaı oramaldaryn tastapty. Al Aqtóbe jáne Ońtústik Qazaqstan oblystary men Jezqazǵan qalasynda tártipke baǵynbaıtyn ata-analar jetkilikti. Sondyqtan zańǵa moıynsunbaǵandardy jazalaý artyq etpeıdi deıdi Din isteri mınıstrligindegiler. Sebebi, eskertýdi elemegender ákimshilik jýapkershilikke tartylady.
Birinshi eskertýden soń, talapty oryndamaǵan ata-anaǵa jıyrma myń teńgeden astam aıyppul salynady. Buǵan moıynsunbasa, ol aıyppul eki esege kóbeıedi. Iaǵnı, 45 myń kóleminde. Budan keıin aıtqanǵa kónbeı, zańdy elemeı qoıǵan ata-anadan balany oqshaýlap, arnaıy mektepke jiberedi. Al balasyna qatysty zańdy oryndaýdan múldem bas tartyp jatsa, ata-analyq quqyǵynan aırylady.
Balǵabek Myrzaev, QR Din isteri jáne azamattyq qoǵam mınıstrliginiń basqarma basshysy:
– Neke jáne otbasy týraly kodekste qarastyrylǵan. Ol jerde eger ata-ana tórtinshi márte muny taǵy da tabandap tirep, qoldanystaǵy zańdardy oryndaǵysy kelmegen jaǵdaıda ata-ana quqyǵynan aıyrý qarastyrylǵan. Sondyqtan búgin biz ata-anaǵa túsindirip jatyrmyz.
Muǵalim – zańger emes. Olar oramalǵa qatysty ata-ana óz quqyǵyn alǵa tartqanda kóbisi abdyrap qalady eken. Aqtóbeniń ózinde din basqarmasyndaǵylardan jıyrmadan astam mekteptiń dırektory zańdyq turǵydan kómek berýdi surapty.
– Qazir olarǵa Astanadan kelgen mamandar keńes berip jatyr. Din isteri jáne azamattyq qoǵam mınıstrligindegiler mundaı jumystardy ózge de aımaqtarda júrgizetinderin aıtady.
