Qazaqstanda keiingi jyldary bilim berý infraqurylymyn jańǵyrtý qarqyndy júrip jatyr. 2025 jyldyń ózinde elde 196 myń oqýshyǵa arnalǵan 200-den astam mektep paidalanýǵa berilgen. Alaida jańa mektepterdiń kóbeiýi bilim sapasynyń artýyna birden kepil bola almaidy. Bul týraly bilim salasyndaǵy Qazaq Expert Club sarapshysy Jazira Asanova aitty, dep habarlaidy dalanews.kz.
Sarapshynyń sózinshe, búginde basty másele qansha mektep salynǵanynda emes, olardyń ainalasynda tiimdi bilim berý ortasyn qalyptastyra alýda.
Aitýynsha, halyqaralyq tájiribe zamanaýi infraqurylymnyń ózi joǵary nátijege jetkizý úshin jetkiliksiz ekenin kórsetedi. Bilim sapasyna mekteppen qatar ata-analar, muǵalimder, jergilikti qaýymdastyqtar, mádeni uiymdar, biznes pen memlekettik institýttardyń ózara bailanysy da áser etedi.
Jazira Asanova Ekonomikalyq yntymaqtastyq jáne damý uiymynyń (EYDU) 2026 jylǵy zertteýine súiene otyryp, bilim berý reformalary kóbine qarjy tapshylyǵynan emes, olar júzege asyrylatyn ortanyń erekshelikterinen qiyndyqqa tap bolatynyn atap ótti.
Sondai-aq sarapshy bilim salasyndaǵy bedeldi zertteýshi Djon Hettidiń eńbekterine toqtaldy. Onyń pikirinshe, oqýshylardyń jetistigine áser etetin mańyzdy faktorlardyń biri – pedagogterdiń ujymdyq tiimdiligi, iaǵni muǵalimderdiń ár balanyń nátijesine birlesip yqpal ete alatynyna degen ortaq senimi.
“Balanyń jetistigi tek mektepke bailanysty emes. Onyń nátijesine ata-analar, muǵalimder, tálimgerler, jattyqtyrýshylar, mádeniet ókilderi, biznes jáne jergilikti bilik te yqpal etedi. Osylardyń barlyǵy bilim berý ekojúiesin qalyptastyrady”, – deidi sarapshy.
Onyń aitýynsha, Qazaqstandaǵy bilim berý júiesiniń negizgi máseleleriniń biri – bilim berý úderisine qatysýshylar áreketiniń tolyq úilespeýi.
“Mektep oqý baǵdarlamasynan bir talap alsa, baǵalaý júiesinen ekinshi talap alady, ata-analardyń kútýleri men eńbek naryǵynyń suranystary da bólek bolýy múmkin. Mundai jaǵdaida ózgerister baiaý engizilip, kúsh-jiger qaitalanyp, mektep pen muǵalimderge qoiylatyn talaptar bir-birine qaishy kele bastaidy”, – dep túsindirdi ol.
Sarapshy Finliandiia men Singapýr sekildi elder bilim berý baǵdarlamalaryn, baǵalaý júiesin, pedagog daiarlaý isin jáne eńbek naryǵynyń suranysyn ondaǵan jyl boiy úilestirip kelgenin atap ótti.
“Mektepterdiń damýyna memleketpen qatar biznes pen úkimettik emes uiymdar da belsendi qatysýy qajet. Bul bolashaq mamandardy daiarlaýǵa, kásibi baǵdar berý men tálimgerlik baǵdarlamalardy damytýǵa múmkindik beredi”, - deidi ol.
Sarapshynyń sózinshe, álemdegi eń tabysty bilim berý júielerin erekshelendiretin nárse – jańa ǵimarattar emes, balanyń ainalasyndaǵy ortanyń ortaq maqsatqa jumyla bilýi.
“Kez kelgen bilim saiasatyna qoiylatyn eń mańyzdy suraq – bul sheshim balaǵa qanshalyqty paidaly? Myqty bilim berý ekojúiesi eresekter balanyń bolashaǵyna qatysty ortaq ustanym qalyptastyra alǵan jerde paida bolady”, – dedi Asanova.
