SHQO ákimi – Danıal Ahmetov aımaqtaǵy mektepterdiń qurylysyna qatysty keńes ótkizip, máseleni jan-jaqty zerttep, demografıalyq jaǵdaıdy taldap, qaı eldimekende jáne qansha oryndyq mektep salý kerektigin aıqyndaý qajet ekenin aıtty, – dep habarlaıdy Dalanews.kz SHQO oblysy ákiminiń baspasóz qyzmetine silteme jasap.

Aımaq basshysynyń aıtýynsha, tıimdi daıyn tıptik jobalardy paıdalanǵan jón. Solardyń biri – Tavrıadaǵy mektep. \

– Bul óte sátti joba, osyndaı jobalardy kóbeıtý kerek. Qujattamalardy ázirleý óte qymbat prosedýra. Al, tıptik jobalar búdjet qarjysyn únemdeýge múmkindik beredi, – dedi Danıal Ahmetov.

Bolashaqta Ýrýnhaıka aýylynda júz oryndyq mektep salynady jáne bul jobany basqa eldi mekender úshin de qoldanýǵa bolady. Budan bólek, kelesi jyly Semeıdiń Qaraǵaıly jáne Et kombınaty aýdandarynda mektepter salý josparlanyp otyr.

– 2023 jyly Óskemendegi oblystyq drama teatrdyń artynan bir mektep ashylady. Óıtkeni bul óte qarqyndy damyp kele jatqan aýdan. Jylandy, Beloýsovka kentteri men Qapaı aýylyna da jańa mektep salynady. QR Bilim jáne ǵylym mınıstrligi salýǵa daıyn 32 mekteptiń ishinen bizge 25-i óte qajet, – dep atap ótti oblys ákimi.

Keńeste 2021-2025 jyldarǵa arnalǵan perspektıvalyq jospar qurý qajettigi aıtyldy. Onda oqý oryndaryn qaıda salý kerektigi, qaı mekemelerge kúrdeli jóndeý jumystaryn júrgizý qajettigi naqty jazylady. Bul aldaǵy ýaqytta eń aldymen qarjyny durys bólýge jáne salǵan mektepke bala tolmaı qalyp, artyq shyǵyndalyp qalmaýǵa kómektesetin jospar bolady.