Almatydaǵy mektep ashanalaryn uiymdastyrýǵa qatysty memlekettik satyp alý konkýrstarynyń ainalasynda daý týyndady. 1996 jyldan beri qoǵamdyq tamaqtandyrý salasynda jumys istep kele jatqan «Bolashaq» JShS direktory Nazira Ryspekova memlekettik satyp alý kezinde zań buzýshylyqtarǵa jol berilgenin aityp, quzyrly organdardan tekseris júrgizýdi talap etedi, dep jazady Dalanews.kz
Kásipkerdiń aitýynsha, kompaniia 30 jylǵa jýyq ýaqyt boiy mektep ashanalaryn basqaryp, 80-ge jýyq adamdy turaqty jumyspen qamtyp keledi. Alaida biylǵy naýryz aiynan bastap kásiporyn birneshe mektep boiynsha memlekettik satyp alý barysynda qiyndyqtarǵa tap bolǵan.
«Bul naryqta bizdiń áýletimiz otyz jyldan beri eńbek etip keledi. Aldymen anam ainalysty, keiin men jalǵastyrdym. Osy ýaqytqa deiin eshqandai daý bolǵan emes. Biraq biylǵy naýryzdan bastap túsiniksiz jaǵdailarǵa tap boldyq», – deidi Nazira Ryspekova.
«Tenderdi bireý utady, jumysty basqa bireý atqarady»
Kásipkerdiń sózinshe, Almatydaǵy №206, №207, №221, №10, №74 jáne №224 mektepterde memlekettik satyp alý konkýrsynyń jeńimpazy retinde bir kompaniia kórsetilgenimen, ashanalarda naqty qyzmetti basqa kásipkerler atqaryp jatyr.
«Zań boiynsha tenderdi utyp alǵan kompaniia sharttaǵy mindettemelerdi ózi oryndaýy tiis. Biraq biz birneshe mektepte múldem basqa adamdardyń jumys istep jatqanyn anyqtadyq. Tipti konkýrsqa qatyspaǵan kásipkerler saýda júrgizip otyr dep esepteimiz», – deidi ol.
Ryspekovanyń aitýynsha, atalǵan mektepterde jeke kásipkerler retinde tirkelgen «Úmit Býngalo draive» jáne «Ali Aiia» ataýlarymen jumys isteitin kásipkerlerdiń qyzmeti baiqalǵan.
Sondai-aq ol satyp alýshylardan túsetin QR-tólemder de kelisimsharttaǵy resmi jetkizýshiniń emes, ózge tulǵalardyń esepshottaryna aýdarylyp jatqanyn alǵa tartady.
«Eger QR arqyly tólengen qarajat resmi jetkizýshiniń shotyna emes, basqa adamnyń esepshotyna túsip jatsa, bul shart talaptaryna qaishy keledi dep esepteimin. Mundai máselege quqyq qorǵaý jáne baqylaýshy organdar nazar aýdarýy kerek», – deidi kásipker.
«Bári diplomdardy tekserýden bastaldy»
Nazira Ryspekovanyń aitýynsha, daý buryn bilim salasynda qyzmet atqarǵan zańger ári konsýltant Dosymjan Baltabaevtyń shaǵymynan keiin bastalǵan. Kásipkerdiń sózinshe, shaǵym negizinde onyń qyzmetkerleriniń diplomdaryna tekseris júrgizilip, keiin aýdit qorytyndysynda keibir qujattar jaramsyz dep tanylǵan.
«Meniń oiymsha, bul tekseristiń túpki maqsaty – bizdi naryqtan yǵystyryp, basqa adamdardyń kirýine jol ashý boldy. Qazir daýly mektepterde jumys istep júrgenderdiń arasynda osy iske qatysy bar adamdardyń jaqyndary bar dep sanaimyn», – deidi Ryspekova.
Bul málimdemelerge qatysty atalǵan tulǵalardyń ustanymy ázirge belgisiz.
Kásipker sot sheshimimen kelispeidi
«Bolashaq» JShS memlekettik satyp alý nátijelerine bailanysty ishki memlekettik aýditke shaǵym túsirgenimen, kásipker onyń nátijesine qanaǵattanbaǵanyn aitady. Keiin másele sotqa jetken. Sot konkýrs qorytyndysyn ózgerissiz qaldyryp, jańa jeńimpazben 18 naýryzda jasalǵan kelisimshartty zańdy dep tanyǵan. Osylaisha Tatiana Neýmiavakina jeńimpaz mártebesin saqtap qalǵan.
Alaida Nazira Ryspekova bul sheshimmen kelispeitinin aityp, joǵary turǵan sot satylaryna jáne ýákiletti organdarǵa shaǵymdanýǵa nietti ekenin jetkizdi.
«Men bul sheshimmen kelispeimin. Barlyq jaǵdaiǵa jan-jaqty ári táýelsiz tekseris júrgizilgenin qalaimyn. Eger bári zań aiasynda bolsa, oǵan da kóz jetkizý qajet», – deidi ol.
Quzyrly organdardan tekseris suraidy
Kásipker mektep ashanalaryn uiymdastyrý salasynda memlekettik satyp alý talaptarynyń naqty oryndalýyna keshendi tekseris júrgizý qajet dep esepteidi. Onyń pikirinshe, konkýrs jeńimpazy men qyzmetti naqty atqarýshy tulǵalardyń sáikestigi, biýdjet qarajatynyń jumsalýy, sondai-aq QR-tólemderdiń qai shottarǵa túsip jatqany jan-jaqty zerttelýi tiis.
Aita keteiik, Nazira Ryspekova kótergen jaittar onyń jeke málimdemeleri bolyp tabylady. Bul máseleler boiynsha túpkilikti quqyqtyq baǵany quzyrly memlekettik organdar men sot qana bere alady.
