Qazaqstanda meditsina salasy jasandy intellekt (JI) tehnologiialaryn engizý arqyly jańa damý satysyna qadam basyp keledi. Tsifrlandyrý men innovatsiialyq sheshimder dárigerlerdiń jumysyn jeńildetip qana qoimai, naýqastarǵa kórsetiletin meditsinalyq qyzmettiń sapasyn arttyrýǵa baǵyttalǵan,- dep habarlaidy Dalanews.kz
40 jyldyq tájiribesi bar akýsher-ginekolog, Qazaqstandaǵy densaýlyq saqtaý júiesiniń qalyptasýyna úles qosqan dáriger Viacheslav Lokshin bul úderisti tolyǵymen qoldaidy.
– Bul taqyryp meni burynnan qyzyqtyrady. Ǵylym men tehnikanyń múmkindigin, ásirese jasandy intellektini, barynsha paidalanýymyz kerek. Óz tájiribemizde de qoldanyp kelemiz. Máselen, eki jyldan beri bizdiń klinikadaǵy embriologiia zerthanasynda JI tehnologiiasy embriondy irikteý protsesinde kómek kórsetip keledi, – deidi Lokshin.
Onyń aitýynsha, álemdik tájiribe JI-diń kei jaǵdaida dástúrli dárigerlik diagnozdan da dálirek nátije beretinin kórsetip otyr. Degenmen, ol bul tehnologiiany tek kómekshi qural retinde qoldaný kerek dep sanaidy.
– Naýqastar ártúrli, aýrýdyń aǵymy da árqily. JI qysqa ýaqyt ishinde birneshe boljam usyna alady, al túpkilikti sheshimdi qabyldaý – dárigerdiń quzyrynda. Jaýapkershilik adamda qalýy tiis, – deidi dáriger.
Meditsinadaǵy jasandy intellekt quraldarynyń qoldanylýy ministrlik deńgeiinde de qyzý talqylanyp keledi. Jýyrda Densaýlyq saqtaý ministrliginde ótken jiynda vedomstvo basshysy Aqmaral Álnazarova men «Qazaqtelekom» AQ Basqarma tóraǵasy Baǵdat Mýsin elimizdegi meditsinalyq infraqurylymdy tsifrlandyrý jobalaryn talqylady.
Ministrlik ókilderiniń málimetinshe, Aqmola oblysynda «JI-terapevt» servisi synaqtan ótýde. Bul júie dáriger men naýqas arasyndaǵy áńgimege taldaý jasap, 80%-ǵa deiin dál aldyn ala diagnoz qoia alady jáne dárigerdiń qujat toltyrýǵa jumsaityn ýaqytyn 40%-ǵa qysqartady.
Sonymen qatar, qashyqtan baqylaý júrgizetin telemeditsinalyq qosymsha da iske qosylmaq. Ol arqyly turǵyndar óz densaýlyǵyn – qan qysymy, pýls, dene temperatýrasy, qandaǵy qant pen ottegi deńgeiin baqylai alady. Bul ásirese shalǵaidaǵy aýyl turǵyndary úshin tiimdi sheshim bolmaq.
Meditsina qyzmetkerleriniń qaýipsizdigin arttyrý úshin pilottyq rejimde smart-beinejetondar da engizilýde. Bul qurylǵylar jedel járdem brigadalarynda ornatylyp, tótenshe jaǵdailarda shuǵyl áreket etýge múmkindik beredi.
– Meditsina qyzmetkerlerine barynsha qaýipsiz jáne tiimdi jumys jaǵdaiyn jasaý – bizdiń basty maqsatymyz. Biz tabysty jobalardy búkil el boiynsha keńeitýge daiynbyz, – dedi ministr Aqmaral Álnazarova.
