قازاقستاندا مەديسينا سالاسى جاساندى ينتەللەكت (جي) تەحنولوگيالارىن ەنگىزۋ ارقىلى جاڭا دامۋ ساتىسىنا قادام باسىپ كەلەدى. سيفرلاندىرۋ مەن يننوۆاسيالىق شەشىمدەر دارىگەرلەردىڭ جۇمىسىن جەڭىلدەتىپ قانا قويماي، ناۋقاستارعا كورسەتىلەتىن مەديسينالىق قىزمەتتىڭ ساپاسىن ارتتىرۋعا باعىتتالعان،- دەپ حابارلايدى Dalanews.kz
40 جىلدىق تاجىريبەسى بار اكۋشەر-گينەكولوگ، قازاقستانداعى دەنساۋلىق ساقتاۋ جۇيەسىنىڭ قالىپتاسۋىنا ۇلەس قوسقان دارىگەر ۆياچەسلاۆ لوكشين بۇل ۇدەرىستى تولىعىمەن قولدايدى.
– بۇل تاقىرىپ مەنى بۇرىننان قىزىقتىرادى. عىلىم مەن تەحنيكانىڭ مۇمكىندىگىن، اسىرەسە جاساندى ينتەللەكتىنى، بارىنشا پايدالانۋىمىز كەرەك. ءوز تاجىريبەمىزدە دە قولدانىپ كەلەمىز. ماسەلەن، ەكى جىلدان بەرى ءبىزدىڭ كلينيكاداعى ەمبريولوگيا زەرتحاناسىندا جي تەحنولوگياسى ەمبريوندى ىرىكتەۋ پروسەسىندە كومەك كورسەتىپ كەلەدى، – دەيدى لوكشين.
ونىڭ ايتۋىنشا، الەمدىك تاجىريبە ءجي-دىڭ كەي جاعدايدا ءداستۇرلى دارىگەرلىك دياگنوزدان دا دالىرەك ناتيجە بەرەتىنىن كورسەتىپ وتىر. دەگەنمەن، ول بۇل تەحنولوگيانى تەك كومەكشى قۇرال رەتىندە قولدانۋ كەرەك دەپ سانايدى.
– ناۋقاستار ءارتۇرلى، اۋرۋدىڭ اعىمى دا ءارقيلى. جي قىسقا ۋاقىت ىشىندە بىرنەشە بولجام ۇسىنا الادى، ال تۇپكىلىكتى شەشىمدى قابىلداۋ – دارىگەردىڭ قۇزىرىندا. جاۋاپكەرشىلىك ادامدا قالۋى ءتيىس، – دەيدى دارىگەر.
مەديسيناداعى جاساندى ينتەللەكت قۇرالدارىنىڭ قولدانىلۋى مينيسترلىك دەڭگەيىندە دە قىزۋ تالقىلانىپ كەلەدى. جۋىردا دەنساۋلىق ساقتاۋ مينيسترلىگىندە وتكەن جيىندا ۆەدومستۆو باسشىسى اقمارال ءالنازاروۆا مەن «قازاقتەلەكوم» اق باسقارما ءتوراعاسى باعدات مۋسين ەلىمىزدەگى مەديسينالىق ينفراقۇرىلىمدى سيفرلاندىرۋ جوبالارىن تالقىلادى.
مينيسترلىك وكىلدەرىنىڭ مالىمەتىنشە، اقمولا وبلىسىندا «جي-تەراپيەۆت» سەرۆيسى سىناقتان وتۋدە. بۇل جۇيە دارىگەر مەن ناۋقاس اراسىنداعى اڭگىمەگە تالداۋ جاساپ، 80%-عا دەيىن ءدال الدىن الا دياگنوز قويا الادى جانە دارىگەردىڭ قۇجات تولتىرۋعا جۇمسايتىن ۋاقىتىن 40%-عا قىسقارتادى.
سونىمەن قاتار، قاشىقتان باقىلاۋ جۇرگىزەتىن تەلەمەديسينالىق قوسىمشا دا ىسكە قوسىلماق. ول ارقىلى تۇرعىندار ءوز دەنساۋلىعىن – قان قىسىمى، پۋلس، دەنە تەمپەراتۋراسى، قانداعى قانت پەن وتتەگى دەڭگەيىن باقىلاي الادى. بۇل اسىرەسە شالعايداعى اۋىل تۇرعىندارى ءۇشىن ءتيىمدى شەشىم بولماق.
مەديسينا قىزمەتكەرلەرىنىڭ قاۋىپسىزدىگىن ارتتىرۋ ءۇشىن پيلوتتىق رەجيمدە سمارت-بەينەجەتوندار دا ەنگىزىلۋدە. بۇل قۇرىلعىلار جەدەل جاردەم بريگادالارىندا ورناتىلىپ، توتەنشە جاعدايلاردا شۇعىل ارەكەت ەتۋگە مۇمكىندىك بەرەدى.
– مەديسينا قىزمەتكەرلەرىنە بارىنشا ءقاۋىپسىز جانە ءتيىمدى جۇمىس جاعدايىن جاساۋ – ءبىزدىڭ باستى ماقساتىمىز. ءبىز تابىستى جوبالاردى بۇكىل ەل بويىنشا كەڭەيتۋگە دايىنبىز، – دەدى مينيستر اقمارال ءالنازاروۆا.
