Maiqaiyńda kenshilerdiń úiindi astynda qalǵanyna eki ai boldy. Olardyń týystary prezidentke úndeý jasady, - dep habarlaidy Dalanews.kz.
Kenshilerdiń týystary kezekti úndeýdi týra eki aidan keiin jasaǵan. Úndeý avtorlary prezidentten 36 jastaǵy qutqarýshy Aidos Shaimerden men 55 jastaǵy júrgizýshi Aiyp Tileýbergenovti izdeýge kómektesýdi suraidy.
"Elimiz órkenietti álemde bolǵanymen, ashyq karerdegi adamdardy eki aidan beri qutqara almai jatyrmyz. Aitarǵa sózim joq", – dedi Maiqaiyńdaǵy úiindi astynda qalǵan júrgizýshiniń aǵasy Amangeldi Tileýbergenov.
Úndeýde joǵalyp ketken adamdardyń jaqyndary olardy izdeý jumystaryn jalǵastyrýdy suraǵan.
"Aldaǵy ýaqytqa jumys jospary bolmaǵan soń izdeý toqtap qaldy. Ol qashan daiyn bolady degen suraqqa bizge jaýap bere almai otyr. Sondyqtan ózimiz osyndai uiym taptyq, biraq áli olarmen shart jasasqan joqpyz", – deidi qutqarýshynyń ápkesi Ainash Májitova.
Olar izdeý jumystary jalǵaspai, osymen toqtap qala ma dep alańdap otyr. Olardyń sózinshe, qaiǵyly oqiǵaǵa jaýapty adamdar jazadan qutylyp ketýi múmkin.
Aita keteiik, biyl 4 qańtarǵa qaraǵan túni Pavlodar oblysyndaǵy "Maiqaiyńaltyn" kompaniiasynyń shahtasynyń janynda tútin shyqty degen habar taraǵan bolatyn. Artynsha kompaniianyń tórt qyzmetkeri otyrǵan avtobýs shuńqyrǵa túsip ketken. Eki qyzmetker óli tabyldy.
Qalǵan eki qyzmetker áli kúnge deiin tabylmai jatyr.
