Astana qalasynyń mamandandyrylǵan aýdanaralyq ákimshilik soty "Maıqaıyńaltyn" AQ kenishindegi apatqa jumys berýshi 100% kináli dep tanydy, dep habarlaıdy Dalanews.kz.
2024 jyldyń 4 qańtarynda "Maıqaıyńaltyn" AQ Maıqaıyń jerasty kenishiniń aýmaǵynda "Kásibı áskerılendirilgen avarıalyq-qutqarý qyzmeti" JSHS qyzmetkerleri avtobýs tazartý keńistigine qulap ketken edi. Saldarynan eki adam qaza taýyp, qalǵan ekeýi habar-osharsyz joǵalǵan bolatyn.
Aıta keteıik, eńbek qyzmetine baılanysty ólimge ákelip soqqan jazataıym oqıǵanyń sebepterin tergeý maqsatynda komısıa quryldy.
Tergeý qorytyndysy boıynsha komısıa toptyq jazataıym oqıǵany tergeý aktisin jasap, oǵan jumys berýshiniń 100% kinási bar ekeni anyqtaldy.
"Maıqaıyńaltyn" AQ jazataıym oqıǵaǵa qatysy joq ekenin aıtyp, daýlasty.
İsti qaraý kezinde sot taý-ken massasynyń keńistikke qulaýy saldarynan toptyq jazataıym oqıǵanyń sebepterine mynalardy jatqyzdy:
1."Maıqaıyńaltyn" AQ jaýapty tulǵalary tarapynan taý-ken jumystarynyń qaýipsiz júrgizilýine óndiristik baqylaýdy tıisinshe júzege asyrmaı, jumys óndirisin qanaǵattanarlyqsyz uıymdastyrýy.
2.Taý-ken jáne geologıalyq barlaý jumystaryn júrgizetin qaýipti óndiristik obektiler úshin ónerkásiptik qaýipsizdikti qamtamasyz etý qaǵıdalaryn buza otyryp, bloktardy pysyqtaý kezinde opyrylý prosesin tıisti deńgeıde baqylamaý.
3.Talapkerdiń ken qazbalaryn pysyqtaý kezinde qazba birlikterin (bloktaryn) jetildirýge arnalǵan jobalary bolmaǵan (ázirlenbegen).
Derekter men basqa da mán-jaılardy sotta zerttelgen tergeý materıaldary, onyń ishinde saraptamalar men kishi komısıalardyń qorytyndylary rastady.
"Jazataıym oqıǵa jumys ýaqytynda "KÁAQQ" JSHS qyzmetkerleriniń eńbek mindetterin oryndaý kezinde bolǵan. "Maıqaıyńaltyn" AQ jaýapty tulǵalarynyń áreketterinen (áreketsizdiginen) týyndaǵan jazataıym oqıǵanyń sebepterin negizge ala otyryp, talapkerdiń 100% kinási bar dep tanyldy", - delingen sot habarlamasynda.
Osyǵan baılanysty sot eńbek komıteti men ónerkásiptik qaýipsizdik komıtetine talap qoıýdy qanaǵattandyrýdan bas tartty.
Sot ónerkásiptik qaýipsizdik komıtetin tıisti emes tulǵa retinde tanydy.
Sheshim zańdy kúshine engen joq.
Aıta keteıik, bıyl 4 qańtarda "Maıqaıyńaltyn" AQ aýmaǵynda 4 adam otyrǵan avtobýs opyrylǵan shuńqyrǵa qulap ketken edi. Saldarynan 2 qutqarýshy kóz jumdy, qalǵan 2 adam (1 qutqarýshy, 1 júrgizýshi) áli tabylmaı jatyr.
