استانا قالاسىنىڭ مامانداندىرىلعان اۋدانارالىق اكىمشىلىك سوتى "مايقايىڭالتىن" اق كەنىشىندەگى اپاتقا جۇمىس بەرۋشى 100% كىنالى دەپ تانىدى، دەپ حابارلايدى Dalanews.kz.

2024 جىلدىڭ 4 قاڭتارىندا "مايقايىڭالتىن" اق مايقايىڭ جەراستى كەنىشىنىڭ اۋماعىندا "كاسىبي اسكەريلەندىرىلگەن اۆاريالىق-قۇتقارۋ قىزمەتى" ج ش س قىزمەتكەرلەرى اۆتوبۋس تازارتۋ كەڭىستىگىنە قۇلاپ كەتكەن ەدى. سالدارىنان ەكى ادام قازا تاۋىپ، قالعان ەكەۋى حابار-وشارسىز جوعالعان بولاتىن.

ايتا كەتەيىك، ەڭبەك قىزمەتىنە بايلانىستى ولىمگە اكەلىپ سوققان جازاتايىم وقيعانىڭ سەبەپتەرىن تەرگەۋ ماقساتىندا كوميسسيا قۇرىلدى.

تەرگەۋ قورىتىندىسى بويىنشا كوميسسيا توپتىق جازاتايىم وقيعانى تەرگەۋ اكتىسىن جاساپ، وعان جۇمىس بەرۋشىنىڭ 100% كىناسى بار ەكەنى انىقتالدى.

"مايقايىڭالتىن" اق جازاتايىم وقيعاعا قاتىسى جوق ەكەنىن ايتىپ، داۋلاستى.

ءىستى قاراۋ كەزىندە سوت تاۋ-كەن ماسساسىنىڭ كەڭىستىككە قۇلاۋى سالدارىنان توپتىق جازاتايىم وقيعانىڭ سەبەپتەرىنە مىنالاردى جاتقىزدى:

1."مايقايىڭالتىن" اق جاۋاپتى تۇلعالارى تاراپىنان تاۋ-كەن جۇمىستارىنىڭ ءقاۋىپسىز جۇرگىزىلۋىنە وندىرىستىك باقىلاۋدى تيىسىنشە جۇزەگە اسىرماي، جۇمىس ءوندىرىسىن قاناعاتتانارلىقسىز ۇيىمداستىرۋى.

2.تاۋ-كەن جانە گەولوگيالىق بارلاۋ جۇمىستارىن جۇرگىزەتىن ءقاۋىپتى وندىرىستىك وبەكتىلەر ءۇشىن ونەركاسىپتىك قاۋىپسىزدىكتى قامتاماسىز ەتۋ قاعيدالارىن بۇزا وتىرىپ، بلوكتاردى پىسىقتاۋ كەزىندە وپىرىلۋ پروسەسىن ءتيىستى دەڭگەيدە باقىلاماۋ.

3.تالاپكەردىڭ كەن قازبالارىن پىسىقتاۋ كەزىندە قازبا بىرلىكتەرىن (بلوكتارىن) جەتىلدىرۋگە ارنالعان جوبالارى بولماعان (ازىرلەنبەگەن).

دەرەكتەر مەن باسقا دا ءمان-جايلاردى سوتتا زەرتتەلگەن تەرگەۋ ماتەريالدارى، ونىڭ ىشىندە ساراپتامالار مەن كىشى كوميسسيالاردىڭ قورىتىندىلارى راستادى.

"جازاتايىم وقيعا جۇمىس ۋاقىتىندا "كااقق" ج ش س قىزمەتكەرلەرىنىڭ ەڭبەك مىندەتتەرىن ورىنداۋ كەزىندە بولعان. "مايقايىڭالتىن" اق جاۋاپتى تۇلعالارىنىڭ ارەكەتتەرىنەن (ارەكەتسىزدىگىنەن) تۋىنداعان جازاتايىم وقيعانىڭ سەبەپتەرىن نەگىزگە الا وتىرىپ، تالاپكەردىڭ 100% كىناسى بار دەپ تانىلدى"، - دەلىنگەن سوت حابارلاماسىندا.

وسىعان بايلانىستى سوت ەڭبەك كوميتەتى مەن ونەركاسىپتىك قاۋىپسىزدىك كوميتەتىنە تالاپ قويۋدى قاناعاتتاندىرۋدان باس تارتتى.

سوت ونەركاسىپتىك قاۋىپسىزدىك كوميتەتىن ءتيىستى ەمەس تۇلعا رەتىندە تانىدى.

شەشىم زاڭدى كۇشىنە ەنگەن جوق.

ايتا كەتەيىك، بيىل 4 قاڭتاردا "مايقايىڭالتىن" اق اۋماعىندا 4 ادام وتىرعان اۆتوبۋس وپىرىلعان شۇڭقىرعا قۇلاپ كەتكەن ەدى. سالدارىنان 2 قۇتقارۋشى كوز جۇمدى، قالعان 2 ادام (1 قۇتقارۋشى، 1 جۇرگىزۋشى) ءالى تابىلماي جاتىر.