Atalmysh keshtiń ereksheligi men daıyndyǵy týraly ánshiniń ózi baıandady. Bul týraly comode.kz portaly jazady.
2015 jyly Astana qalasynyń ákimdiginiń qoldaýymen, Bolat Majaǵulov myrzanyń usynysymen analar, áıelder merekesiniń qarsańynda konsert ótkizgen bolatyn.
Araǵa úsh salyp Almaty qalasynda da esep beretin ýaqyt keldi-aý dep oıladyq. «Jeke keshińizdi nege osynshama ýaqyt uzaq kúttirdińiz?» degen suraqty jıi estip júrmin.
Sebebi, men úshin Sáken emes, «Mýzart» árdaıym birinshi orynda. Toptaǵy bárimiz de kóbinese birinshi kúshti «Mýzartqa» salamyz. Shyǵarmashylyq jaǵynan da, ýaqyt jaǵynan da Mýzartpen sanasamyz. Tipti, buǵan deıin men óz tarapymnan mundaı usynysty jigitterge jasaǵan da emespin, oılaǵan da emespin. «Sabaqty ıne – sátimen» degen osy shyǵar!
Konsertim 100% jandy daýysta bolady.
Sonshalyqty ózgeshe bolyp, men tikushaqpen ushyp kelemin dep aıtpaımyn. Biraq, meniń ónerimdi baǵalap, syılap kelgen kórermen jalyǵyp, sharshap ketpeıtindeı bir demmen ótse deımin. Repertýarymda ánderim óte kóp. Bárin oryndaý, árıne, múmkin emes. Otyzǵa jýyq án oryndalady. Arasynda jańa ánder, jańa dýetter bolady.
Ónersúıer qaýymnyń júreginen oryn tapqan eski ánderdi de bárimiz birge oryndaıtyn bolamyz dep oılaımyn. Kesh qonaqtary: «Mýzart», Zarına Altynbaeva, «SMart» mektebiniń shákirtteri, t.b.syıly qonaqtarym bolady. Meniń jańa qyrymdy da kórip qalýlaryńyz múmkin. Eń bastysy, 100% jandy daýysta bolady.
«Júregimniń ishindegi júregim»
Keshtiń dál bulaı atalýynyń ózindik sebebi bar. Kez-kelgen óner adamynyń shyǵarmashylyǵynda jetistikter men quldyraý, toqyraý, krızıs bolady.
Al, Jaras Sársek aǵamyzdyń sózine jazylǵan, Aıgúl Bajanovanyń áni «Júregimniń ishindegi júregim» sondaı krezısten shyǵarǵan týyndy boldy. Er azamattyń júreginiń ishine anasy, áıeli, ápkesi, ul-qyzdary, baýyry, barlyq áýlet, Otany kiredi. Sonyń bárin bir arnaǵa toǵystyrǵan keremet án jeke keshimniń ataýy bolýǵa tolyq laıyqty dep sanadym.
Kóligimdi satpaımyn, demeýshiler tabyldy.
Kólik satý týraly áńgime ázil bolatyn. Jalpy, jeke keshimniń shyǵyny meniń kóligimniń baǵasymen teń ekenin aıtqan edim. Qazir «kóligimdi satpaımyn, demeýshiler tabyldy» dep ázildeımin.
Basty demeýshilerim – halqym.
Al, qarjy jaǵynan azamattyq tanytyp jatqan jigitter bar. Shynynda, jaqyn-juraǵattardyń eń bolmasa sóz járdemmen kómektesetin, tanylatyn, synalatyn kezi desem de bolady. Bul da bir úlken jaýapkershilikti talap etetin jumys. Janymnan tabylyp, qoldaý kórsetip júrgen jandar bar, Allaǵa shúkir. Buryn ata-ájem: «óziń jaqsy bolsań, aınalańnyń bári jaqsy bolady» dep otyratyn. Shúkir, aınalama jaqsylar jınaldy. Eń bastysy halyqtyń qoldaýy, suranysy joǵary.
