Byltyr Almaty oblysynda 950 myń sharshy metrden astam turǵyn úi salynyp, 17 aýyl gazben qamtamasyz etildi. Sondai-aq 700 shaqyrymǵa jýyq jol jóndeldi jáne basqa da mańyzdy jumystar atqaryldy. Óńirde partiianyń sailaýaldy ýádeleriniń júzege asyrylý tiimdiligi Qonaev qalasynda ótken «AMANAT» partiialyq baqylaý komitetiniń kóshpeli otyrysynda talqylandy. Sonymen qatar partiia ókilderi sailaýaldy baǵdarlama aiasynda salynyp jatqan áleýmettik nysandardyń qurylysymen tanysty.
Almaty oblysynyń ákimi Marat Sultanǵazievtiń aitýynsha, byltyr óńirde naqty ekonomika salasynda 23 joba júzege asyrylyp, 8 myń jumys orny ashyldy. Sondai-aq 19,4 myń orynǵa arnalǵan 18 mektep, 47 jańa densaýlyq saqtaý nysany salyndy. Osylaisha «AMANAT» partiiasynyń «Halyqpen birge!» sailaýaldy baǵdarlamasy azamattardyń ózekti máselelerin sheshýge jáne oblystyń turaqty damýyna baǵyttalǵanyn kórsetti.
«Jer amanaty» partiialyq jobasy aiasynda byltyr 420 myń gektardan astam paidalanylmai jatqan aýyl sharýashylyǵy jerleri anyqtalsa, onyń 90 myń gektary memleket menshigine qaitaryldy. Al «Aýyl amanaty» jobasy boiynsha sońǵy eki jylda 1200-den astam adam jeńildetilgen nesie aldy», – dedi ol.
Almaty oblystyq máslihatyndaǵy «AMANAT» partiiasy fraktsiiasynyń jetekshisi Lázzat Turlashov máslihat depýtattarynyń jumysy týraly aitty. 2024 jyly halyq qalaýlylary sailaýaldy baǵdarlama nysandaryna 220-dan astam reid júrgizip, 450-ge jýyq depýtattyq saýal joldady. Sonymen birge onyń aitýynsha, sailaýaldy baǵdarlamanyń kei tarmaqtarynyń oryndalmaý sebebi – qarjynyń jetkiliksizdigi men keibir merdigerlerdiń jaýapsyzdyǵy.
Komitet tóraǵasynyń orynbasary Maira Aisina sailaýaldy baǵdarlamanyń árbir negizgi nysanyna qoiylǵan partiialyq baqylaý beketteriniń mańyzdylyǵyn atap ótti. Onyń aitýynsha, ambýlatoriialar nemese mektepter salý siiaqty tapsyrmalardy oryndaýdaǵy kidirister keide naqty sebeptermen bailanysty bolǵanymen, mundai jaǵdailar sirek kezdesedi.
«Menińshe, másele sebepterde emes, naqty jaýapty adamdarda, máslihat depýtattarynda. Barlyq máslihattarda bizdiń partiialyq fraktsiialar basymdyqqa ie, sondyqtan kez kelgen máselelerdi jedel sheshýge jáne jergilikti biýdjetten qarajat bólýge múmkindikteri bar. Jaýapty qyzmetterge kirispes buryn, olar ózderine «Men ne úshin partiiaǵa kirdim, ne úshin depýtat boldym?» degen suraqtardy qoiýy kerek. Eshkim olardy jaýapkershilik alýǵa májbúrlegen joq!» – dedi ol.
Sonymen qatar merziminde salynbaǵan nemese jóndelmegen mektepter, emhanalar, sport keshenderi jáne joldar tizimi jasalǵan. Májilis depýtaty, Komitet tóraǵasy Pavel Kazantsevtiń aitýynsha, josparlaýdaǵy qatelikter kóptegen nysandardyń qarjylandyrylmaýyna ákelgen. Al máslihattar kez kelgen ózekti máseleler boiynsha naqty sheshimder qabyldaýǵa qabiletti.
«Nysandardaǵy týyndaǵan máseleler memlekettik organdardyń, tapsyrys berýshilerdiń jáne merdigerlerdiń qatysýymen suraý salý, resmi hattar jáne jinalystar arqyly jedel qaralýy tiis. Alaida qazirgi jaǵdai ondai emes. Keibir depýtattar ózderine bekitilgen nysandarǵa múldem barmaidy, jumystardyń barysyna qyzyǵýshylyq tanytpaidy, keide tipti qai nysannyń baqylaýǵa alynǵanyn bilmeidi», – dedi ol.
Otyrystyń qorytyndysy boiynsha Komitet músheleri oblystyq jáne aýdandyq máslihat depýtattarynyń sailaýaldy baǵdarlamanyń jekelegen tarmaqtaryn saqtamaǵany jáne olardy júzege asyrýǵa jetkilikti baqylaý júrgizbegeni úshin partiialyq jaýapkershiligin qarastyrý týraly sheshim qabyldady.
