Reseidegi marketpleister shabýyldan búlingen taýar úshin ótemaqy tóleýden bas tartty, dep habarlaidy dalanews.kz.
Reseidiń Wildberries jáne Ozon sekildi marketpleisteri satýshylarmen jasalatyn kelisimshart talaptaryn ózgertip, áskeri is-qimyldar saldarynan búlingen nemese joiylǵan taýar úshin ótemaqy tólemeitin boldy.
Jańa talaptarǵa sáikes áskeri áreketter, sonyń ishinde ushqyshsyz ushý apparattarynyń soqqysy saldarynan taýar joǵalsa nemese búlinse, marketpleister jaýapkershilik almaidy. Ozon bul ózgeristi 1 shildeden bastap, al Wildberries 7 shildeden bastap kúshine engizgen. Kompaniialar bul jóninde seriktesterine aldyn ala habarlaǵan.
Alaida bul másele 18 shildede Ýkraina qarýly kúshteriniń drondary Tambov oblysy men Máskeý oblysyndaǵy Wildberries qoimalaryna soqqy jasaǵannan keiin keńinen talqylana bastady. Saldarynan adamdar qaza taýyp, ondaǵan adam jaraqat alǵan. Sonymen qatar, qoima aýmaǵynyń shamamen 10-15 paiyzy zaqymdanǵan bolýy múmkin.
Wildberries kompaniiasynyń iesi Tatiana Kim Telegram-daǵy paraqshasynda kompaniia joǵalǵan taýar úshin ótemaqy tóleýge mindetti emes ekenin, soǵan qaramastan satýshylarǵa tólenetin ótemaqy kólemi men qarjylyq qoldaý sharalary qarastyrylyp jatqanyn málimdedi. Onyń aitýynsha, qaza tapqandardyń otbasyna 2 million rýblden, aýyr jaralanǵandarǵa 1 million rýblden tólenedi. Qalǵan málimet keiinirek jariialanady.
Buǵan deiin ýkrainalyq dron shabýylynan keiin Tambov oblysynyń Kotovsk qalasy men Máskeý oblysyndaǵy Elektrostal qalasynda ornalasqan Wildberries qoimalarynda órt shyqqan edi.
Elektrostaldaǵy logistikalyq ortalyq - Wildberries-tiń eń iri qoimalarynyń biri. Onyń aýmaǵy - 250 myń sharshy metr. Al Kotovskidegi qoimanyń kólemi - 108 myń sharshy metr.
