Kárim Másimovtiń burynǵy kúieý balasy retinde belgili, “QazTemirTrans” AQ-nyń eks-vitse-prezidenti Azamat Qapenov Reseide syrttai qamaýǵa alyndy. Oǵan kásipker, “Aziia Avto – BIPEK” kompaniialar tobynyń burynǵy iesi Anatolii Balýshkindi aldady degen aiyp taǵylǵan, dep habarlaidy dalanews.kz.
TASS agenttiginiń málimetinshe, sot Azamat jáne Meder Qapenovtarǵa qatysty eki ai merzimge qamaýǵa alý týraly sheshim shyǵarǵan. Qamaý merzimi olardyń naqty ustalǵan sátinen nemese Resei aýmaǵyna ekstraditsiialanǵan jaǵdaida quqyq qorǵaý organdaryna tapsyrylǵan kúnnen bastap esepteledi.
Tergeý nusqasy boiynsha, aǵaiyndy Qapenovtar Qazaqstanda tirkelgen “PTD” JShS-degi 25 paiyzdyq úlesti zańsyz iemdendi degen kúdikke ilingen.
Is materialdarynda olardyń kompaniia qyzmetine bailanysty daýlardy sheshýge kómektesemiz degen jeleýmen Anatolii Balýshkindi adastyrǵany aitylǵan. Kúdiktiler ózderiniń yqpaly bar ekenin alǵa tartyp, máseleni retteýge ýáde bergenimen, shyn máninde mindettemelerin oryndaýdy kózdemegen dep kórsetilgen.
Tergeý derekterine sáikes, kásipkerge keltirilgen materialdyq shyǵyn kólemi shamamen 52 million rýbldi quraidy.
Buǵan deiin Balýshkin Qazaqstandaǵy iri avtokólik óndirýshilerdiń biri sanalatyn «Aziia Avto – BIPEK» kompaniialar tobynyń negizgi iesi bolǵan. Tergeý materialdarynda kompaniianyń ainalym qarajatyn tolyqtyrý úshin kásipkerdiń sol kezdegi «Tsesnabank» (qazirgi Jusan Bank) arqyly 66 mlrd teńge kóleminde nesie alǵany kórsetilgen.
Keiin bank qaryzdy óndirip alý úshin sotqa júgingen. Sot barysynda Balýshkin men onyń seriktesi Erik Saǵymbaevtyń nesie qarajatyn jymqyrǵany anyqtalǵany aityldy. Osydan keiin kásipkerdiń barlyq aktivteri buǵattalyp, kompaniialar tobyna qarasty kásiporyndardyń qyzmeti toqyraýǵa ushyraǵan.
