Kárim Másimovtiń záýlim saraiy ministrlikke tiimsiz bolyp shyqty. Bul týraly Tengrinews.kz jazdy, dep habarlaidy Dalanews.kz.
Astanadaǵy qymbat záýlim úidi Oqý-aǵartý ministrligi óz maqsatyna paidalana almai otyr. Nysan kúrdeli jóndeýdi qajet etetindikten, ony beiimdeýge biýdjetten qarjy qarastyrylmaǵan.
Aita keteiik, 2022 jyly Astanadaǵy Ereimentaý kóshesinde ornalasqan eki qabatty sarai memleket menshigine qaitarylǵan bolatyn. Nysan Kárim Másimov pen ózge de tulǵalarǵa qatysty qozǵalǵan qylmystyq is aiasynda tárkilengen.
2025 jyly aqpanda jalpy aýmaǵy 2877,7 sharshy metr bolatyn ǵimarat E-Qazyna elektron saýda alańynda satylymǵa qoiyldy. Bastapqy baǵasy - 1 883 338 958 teńge. Alaida nysandy satyp alýshy tabylmady.
Sol jyly sáýirde sarai qaitadan aýktsionǵa shyǵarylyp, baǵasy shamamen 200 million teńgege tómendetildi. Degenmen bul joly da úi ótpei qaldy.
Keiin qaitarylǵan aktivterdi basqarý kompaniiasyna Astana qalasynyń ákimdigi áleýmettik qajettilik úshin ǵimaratty berý jóninde ótinish jasaǵan. 2025 jyly qyrkúiekte nysan Arnaiy jáne inkliýzivti bilim berýdi damytýdyń ulttyq ǵylymi-praktikalyq ortalyǵy teńgerimine berilgeni belgili boldy. Ǵimarat múmkindigi shekteýli balalardy oqytý men ońaltýǵa paidalanylýǵa tiis edi.
Alaida 2026 jyly aqpanda saraidyń áli kúnge deiin maqsatty túrde qoldanylmaǵany málim boldy. Oqý-aǵartý ministrligi ókilderiniń aitýynsha, ǵimarat sanitariia talaptaryna sai kelmeidi jáne kúrdeli jóndeý men qaita jańǵyrtýdy qajet etedi. Sonymen qatar, materialdyq-tehnikalyq bazany tolyq jabdyqtaý kerek.
Alaida mundai jumystarǵa vedomstvo biýdjetinde qarajat qarastyrylmaǵan.
Qazir ministrlik memlekettik múlikti basqarý jónindegi ýákiletti organmen birlesip, ǵimaratty oǵan muqtaj ózge memlekettik zańdy tulǵalarǵa berý máselesin qarastyryp jatyr. Nysannyń naqty qai mekemeniń teńgerimine ótetini ázirge belgisiz.
