Ishki ister ministri Erjan Sádenov Ulttyq qaýipsizdik komitetiniń burynǵy tóraǵasy Kárim Másimov qazir qaida ekenin aitty, - dep habarlaidy Dalanews.kz.
BAQ ókilderi Májiliste ministrge "Másimov qaida jazasyn ótep jatyr? Bir is-sharada júrgen sýret bar degen aqparat tarady. Bul aqparat qanshalyq ras? Nelikten jazasyn ótep jatqany týraly birde-bir sýret, video joq?" degen suraq qoidy.
"Barlyq sottalǵan adamdy kórsete almaimyz. Ol sottalǵan. Túzetý mekemesinde jazasyn ótep jatyr", - dep jaýap berdi ministr alǵashynda.
Artynsha jýrnalister vedomstvo basshysynan koloniiaǵa kirip, Másimovten suhbat alýǵa qanshalyq múmkindik baryn surady.
"Ashyq kórsetseńizder. Nege kórsetpeisizder jasyryp?" - dedi BAQ ókili.
"Qalai suhbat? Ony nege kórsetýimiz kerek? Qalai jasyryp? Koloniiaǵa kiretin rásimi bar. Durys qoi? Adam quqyǵyna qatysty biýro bar", - dedi ministr.
Aita keteiik, buǵan deiin Ulttyq qaýipsizdik komiteti Sybailas jemqorlyqqa qarsy qyzmettiń qaýlysy negizinde prokýratýranyń sanktsiiasymen Kárim Másimov pen Dáýlet Erǵojin qylmystyq is boiynsha Astanadaǵy Ulttyq qaýipsizdik komiteti tergeý izoliatorynda qamaýda otyrǵanyn habarlady.
Sol kezde onyń qalǵan orynbasarlary, iaǵni Ánýar Sadyqulov pen Marat Osipovti ustaý oryndary týraly aqparat Ishki ister ministrliginiń quzyrynda ekeni aityldy.
2023 jyly 24 sáýirde Astananyń qylmystyq ister jónindegi mamandandyrylǵan aýdanaralyq soty QR Ulttyq qaýipsizdik komitetiniń eks-tóraǵasy Kárim Másimovke, Ulttyq qaýipsizdik komiteti tóraǵasynyń eks-orynbasarlary Ánýar Sadyqulov, Dáýlet Erǵojin, Marat Osipovke qatysty qylmystyq is boiynsha úkim shyǵarǵan bolatyn.
Sot isti "Asa qupiia" degen belgimen qarady. Kárim Másimov QR Qylmystyq kodeksiniń 175-babynyń 1-bóligi, 179-babynyń 3-bóligi, 362-babynyń 4-bóliginiń 3-tarmaǵy boiynsha kináli dep tanylyp, 18 jyl bas bostandyǵynan aiyryldy. Sonymen qatar, memlekettik qyzmette ómir boiy qyzmet ete almaidy jáne múlki tárkilenedi.
Kárim Másimov general sheni men memlekettik nagradalarynan da aiyryldy.
