Ulybritaniianyń Asa aýyr alaiaq áreketter biýrosy qazaqstandyq ENRC taý-ken tobyna qatysty 10 jyl boiy daýǵa ainalǵan qylmystyq isti toqtatyp, sybailas jemqorlyqqa qatysty tergeýdi aiaqtady. Sebebi, SFO uiymy «kompaniiany qýdalaý úshin dálelder jetkiliksiz» degen qorytyndyǵa kelgen.
2013 jyldyń sáýirinde bastalǵan SFO tergeýi ENRC-tiń Afrikadaǵy ken óndirý kelisimsharttaryn satyp alýyna bailanysty para alý jáne alaiaqtyq týraly aiyptaýlarǵa baǵyttalǵan edi. 2021 jyly úsh qazaqstandyq oligarh qurǵan kompaniia «agenttik tergeýdi durys júrgizbedi jáne qyzmettik quqyq buzýshylyq jasady» dep SFO ústinen Joǵarǵy sotqa aryzdanyp, 70 million fýnt sterling talap etkeni este.
Alaida, Sybailas jemqorlyqqa qarsy kúres toby ENRC azamattyq sot isi SFO-nyń isti toqtatý týraly sheshimine yqpal etken bolýy múmkin degen alańdaýshylyq bildirdi.
Toptyń aǵa zańgeri Helen Teilor: «SFO agenttigi men onyń qyzmetkerlerine ENRC-ten kelgen kóptegen quqyqtyq qiyndyqtar sheshim shyǵarýǵa kelgende úlken ról atqarǵanyn anyqtaý kerek. Osy tergeýge qatysty sot isin júrgizý kompaniianyń is-áreketin qoǵamdyq baqylaýǵa salqynyn tigizdi jáne sybailas jemqorlyqqa ushyraǵandardyń sotta tyńdalýyna kedergi keltirdi», – degen zańger.
SFO veb-saitynda is boiynsha jariialanǵan aqparatta agenttik ENRC-ge qatysty tergeý sotqa jetkizilýi múmkin dálelderdiń bolmaýyna bailanysty jabylǵanyn túsindirdi.
«Jaýapty prokýror retinde biz barlyq isterimizdiń prokýrorlar kodeksinde belgilengen qatań dáleldemelik jáne qoǵamdyq múdde kriteriilerine sáikes kelýin qamtamasyz etýimiz kerek. Tergeý týraly sońǵy sholýdan keiin bizde qylmystyq qýdalaý úshin jetkilikti dáleldemeler joq» qorytyndyǵa keldik jáne isti japtyq», – delingen habarlamada.
Qysqasy, «ENRC SFO óziniń tergeýin aiaqtaǵanyna, al SFO bul máselege endi aralaspaitynyna qýanyshty».
Aitpaqshy, britandyq agenttik sonymen qatar taǵy úsh tergeýdi, atap aitqanda 2017 jyly sybailas jemqorlyqqa qatysty anglo-avstraliialyq kenshi Rio Tinto tergeýiniń jabylǵanyn málimdedi.
